Dhe në fund gjithnjë çështja kthehet në të njëjtën pikë, në lojtarin më të mirë. Juventusi eci përpara në Kupën e Italisë, kryeson në kampionat dhe tashmë po mendon që të ecë mirë edhe në Ligën e Kampionëve, pas rreth një muaji. Dhe pikërisht për këtë del në dritë emri i Didier Drogbasë, që duket se është gjithë e më shumë në mendjen e drejtuesve të “Zonjës së Vjetër”.
Lojtari siç tregojnë shenjat mezi pret që të largohet nga arratia në Kinë, por që nuk do as të humbasë të dashurën Kupë të Afrikës me Bregun e Fildishtë dhe një gjë e tillë mund të sjellë edhe probleme. Pasi pikërisht përkushtimi ndaj kombëtares së vet në rast të ecjes para në turneun afrikan, mund të bëjë që ai të mungojë të tetat e Ligës së Kampionëve mes Juventusit dhe Selltikut. Megjithatë mbetet për t’u sqaruar çështja ekonomike (dhe brenda 16 janarit çdo gjë do të jetë më e qartë) Juventusi nuk do të dojë të ofrojë më shumë se 2,5 – 3 milionë deri në fund të këtij sezoni, plus një alternative prej 5 milionësh për vitin e ardhshëm. Një marrëveshje prej 7,5 – 8 milionësh, pikërisht gjysma e asaj që kërkon Drogba.
Shifra shumë të mëdha dhe larg nga realiteti aktual i merkatos së sportit në Itali. Shpresa e madhe përqendrohet tek fakti se Drogba dëshiron të fitojë për herë të dytë rresht Ligën e Kampionëve.