Ka të bëjë me Lubonjën apo me shpërfilljen dhe talljen?

Shpërthimi i papritur, gati skizofrenik, i Sali Berishës ndaj Fatos Lubonjës, ka ngjallur debate për shkak të mungesës së arsyeve që kishte lidhur me tekstin që i referohej dhe kohës kur reagoi. Mero Baze mendon që  të gjitha arsyet për shpërthimin skizofrenik të Berishës nuk duhet t’i kërkojmë tek përmbajtja e atyre që ka thënë Lubonja, por tek disa regjistrime “off record” në pauzat e emisionit.

Shkruan Baze: “Berisha ka qenë i shqetësuar për dy gafa që u bënë publike lidhur me raportet brenda partisë së çamëve dhe deklaratën e ish- ministrit të Financave të tij në moment sinqeriteti, që borxhi mund të jetë më i lartë nga aq sa deklarohet. Nëse e shikoje me kujdes emisionin, kishte dhe detaje të tjera mes avokat Ngjelës dhe Balliut lidhur me raportet me Berishën dhe pozitën kapitulluese të Balliut, që nuk e mbronte dot Berishën, ndërsa  Ngjela dhe Rakipi talleshin me të. Emisioni në tërësi ishte i mbushur me grimca dhe detaje, që tregonin sa i pavërtetë ka qenë autoriteti i Berishës dhe tek njerëzit e vet dhe sa fallco kanë qenë ata në vitin e fundit të pushtetit me vetë atë. Ai pa aty për gati dy orë se si ishin kundërshtarët e tij, si ishin të çliruar bashkëpunëtorët e tij të mos e mbronin jashtë kamerave dhe si i ishin dekonspiruar aleancat, sidomos ajo me partinë çame. Ai e pa veten në pozita qesharake në gojën e Bodes, Balliut dhe bashkëpunëtorëve të tjerë të tij dhe pa se si askush nuk e merr seriozisht jashtë kamerave. Nuk e duron dot të jetë i talluri i kësaj historie, që përfundoi më 23 qershor…”