Kalendari i testimeve për licencat e reja në profesionet mjekësore

Zbardhet kalendari i testimeve për lëshimin e licencave të reja profesionale në profile të ndryshme mjekësore.  Nëpërmjet burimeve zyrtare Urdhri i Infermierëve të Shqipërisë ka detajuar gjatë ditës së djeshme kalendarin e testimeve për provimet e shtetit që do të japin mijëra kandidatë që janë në pritje të marrjes së licencës profesionale, e cila i lejon ata që të ushtrojnë profesionin për të cilin janë diplomuar. Provimet do të zhvillohen pranë Qendrës Kombëtare të Provimeve sipas datave të përcaktuara për secilin nga profilet mjekësore. Studentët që nuk kanë shlyer detyrimet e praktikës profesionale duhet ta bëjnë këtë gjatë javës së ardhshme, në të kundërt nuk do të lejohen që të hyjnë në provimet e shtetit.  Lista zyrtare e kandidatëve që plotësojnë kushtet për të dhënë provimin e shtetit së bashku me oraret e provimit do të zbardhen në 21 prill.  “Rikujtojmë që studentët që nuk e kanë dhënë provimin e Vlerësimit të Aftësimit Profesional, duhet të dorëzojnë Librezën e Praktikës Profesionale të plotësuar brenda afatit të sipërpërmendur. Ndërsa të gjithë studentët të cilët janë paraqitur në provimet e mëparshme dhe nuk e kanë marrë ose hyjnë këtë sezon për herë të parë duhet të dorëzojnë fotokopjen e Lejes së Praktikës brenda të njëjtit afat në mënyrë që të quhen të regjistruar në provim”, bën të ditur Urdhri i Infermierit. Ndërsa për licencat e reja në mësuesi kandidatët do të duhet të presin mbylljen e vitit. Për këtë kategori është planifikuar që sezoni i radhës së provimeve të shtetit të zhvillohet në mbyllje të vitit 2013.  Ndërkohë sa u takon profesioneve mjekësore janë me qindra kandidatët që nuk ia dolën dot të marrin në sezonet e mëparshme provimin e shtetit. Ndryshe nga kandidatët që e japin për herë të parë provimin e shtetit, mbetësit për të hyrë në provim do të paguajnë një tarifë më të lartë. Tarifë kjo që pëson rritje me numrin e herëve që kandidati e jep këtë provim.

Kalendari i testimeve sipas specialiteteve mjekësore

Datë   2 maj 2013   Mami

Datë    2 maj 2013, Imazheri

Datë   2 maj 2013, Logopedi

Datë   3 maj 2013, Fizioterapi

Datë   3 maj 2013,  Teknik Laboratori

Datë 9 – 10 maj  Farmaci

Datë  13-22 maj  Infermieri