Kam besim te e majta

Letër e nënshkruar,

Preng Pjetri

Edhe pse na ndajnë plot katër muaj nga zgjedhjet vendore, fushata thuajse ka filluar denjësisht. Madje që kur presidenti i vendit dekretoi zyrtarisht datën fikse të zgjedhjeve. Natyrisht primari i partive politike, aktivistëve dhe shoqëria civile kanë si suport lobimin për njerëzit që mendojnë t’i propozojnë për 61 njësitë vendore. Deri këtu s’ka asgjë alarmante. Mirëpo duke ditur numrin e “vogël” të njësive të qeverisjes vendore, dhe numrin e madh të subjekteve politike vetvetiu hamendesh se këto votime janë shumë të komplikuara. Pikësëpari një risi e dukshme është ndarja e re territoriale. Dhe së dyti kredoja politike e forcave progresiste. Irritimi i kahut të djathtë tashmë thuajse ka rënë plotësisht për deri sa vetë PD-ja e ka pranuar definitivisht opsionin e mazhorancës për ndarjen e re. Çka do të thotë një plus i madh për qeverinë dhe të majtën shqiptare. Vihet re një interesim i madh nga grupe dhe individë të ndryshëm teksa prezantojnë emra konkret, madje shpesh herë ngulmojnë t’ua imponojnë të tjerëve të preferuarit e tyre personal. Jo pak raste mund të bëhen prezent nëpër rrjetet sociale edhe replika paksa bajate mes aktivistëve dhe individësh që pa dyshim rrëmbehen nga emocionet momentale. Një gjë duhet kuptuar drejt nga elektorati i majtë si në Lezhë ashtu në gjithë Shqipërinë, e majta do triumfojë me doemos në këto zgjedhje.