“Kapuçonët e zinj” në “Allianz Arena”

Një grup njerëzish misteriozë shkaktoi habi në turmën e tifozëve në “Allianz Arena”, gjatë ndeshjes së Bajernit me Hertën. 11 të panjohur, të gjithë të veshur me pelerina të zeza me kapuçë, u ulën në rresht dhe u panë teksa bënin gjeste të sinkronizuar gjatë takimit. Të ulur në radhën e gjashtë nga poshtë, pranë vijës së mesit të fushës, përballë kamerave, 11 misteriozët u shfaqën edhe në ekranet anembanë botës. Një tifoz, Torsten Schmidt, tha: “Ishte shumë e çuditshme. Qëndruan të qetë për një kohë të gjatë, pastaj kapeshin për dore, ngriheshin njëherazi në këmbë e më pas uleshin. Të gjithë aty rrotull u hutuan.

Disa qeshnin, disa të tjerë dukeshin të habitur. Ishte vërtet gjë e çuditshme”. Misteri rreth këtyre njerëzve shtohet edhe më tepër nga fakti se simboli që kishin mbi pelerina është shfaqur javët e fundit në vende të ndryshme të botës dhe ende askush nuk ia di kuptimin. Ky simbol u shfaq për herë të parë më 20 tetor, në një hologram në malin përballë Rio De Zhaneiros në Brazil, ndërsa 24 orë më pas në Hackeny Marshes në Londër. Në fushat e futbollit amator në kryeqytetin anglez u panë dhjetëra topa të vegjël të zinj si dhe një shumë i madh, me diametër tre metra, ndërsa më pas i njëjti simbol u shfaq në tabelat e famshme të reklamave në Nju Jork. Në mënyrë të përsëritur, së bashku me simbolin, është shfaqur edhe mesazhi #WINNERTAKESEARTH, që do të thotë “Fituesi merr Tokën”.