Ende pa kaluar 6 muaj, qeveria shqiptare vendos të lehtësojë edhe më tej bizneset e pajisura me kasë fiskale. Referuar vendimit që pritet të miratohet, detyrimi ligjor i kontrollit të kasave fiskale tashmë nuk do të kryhet më 1 herë në vit, por 1 herë në 2 vite. Ky vendim u njoftua nga kryeministri Sali Berisha në mbledhjen me deputetët e grupit parlamentar, ku paralajmëroi se paralelisht do të përgjysmohet edhe kosto e këtij kontrolli. Vendosja e kasave fiskale për bizneset nisi të aplikohet në vitin 2010 dhe mes debateve të forta publike lidhur me koston, qeveria vendosi të marrë përsipër rimbursimin e tyre. Pavarësisht rimbursimit 100 për qind nga qeveria, bizneset ishin të detyruara që të paguanin rreth 10 mijë leke për kontrollin periodik të tyre çdo 6 muaj. Në muajin shtator të vitit të kaluar, qeveria shqiptar vendosi të ulë numrin e kontrolleve periodike, duke përcaktuar përmes një vendimi detyrimin që kontrollet të zhvilloheshin 1 herë në vit. Paralelisht me ndryshimin e detyrimit për kontrollin periodik, vendimi parashikonte edhe uljen e kostos së këtij kontrolli nga 9 mijë lekë në 4 mijë lekë. Me vendimin e ri, sipas kryeministrit, bizneset do të paguajnë gjysmën e çmimit të tanishëm, pra 2 mijë lekë për çdo dy vite që duhet të ushtrohet kontrolli i kasave fiskale.