Kë “nderojnë” dekoratat e shumta të akorduara nga presidenti?

Të mbash një titull të lartë shtetëror është një nder eksluziv dhe krejt i veçantë në pothuajse çdo vend të botës. Me përjashtim të Shqipërisë…

Një fenomen i vjetër, por që ka vijuar nën drejtimin e Ilir Metës duke kaluar tashmë çdo cak, pasi çdo vit, me qindra shqiptarë e dhjetëra të huaj nderohen me urdhërat, titujt e dekoratat më të rëndësishme që akordon shteti shqiptar.

Nga viti 2017, faqja e Presidencës ka ndalur së publikuari listën e përfituesve të secilit prej 12 titujve, që me ligj akordohen nga ana e Presidentit të Republikës.

http://president.al/old/category/akte-ligjore/dekorime/dekorata-e-flamurit-kombetar/

Mjafton një kërkim i thjeshtë, në linkun e mësipërm zyrtar, për të kuptuar se publikisht, dekorata e fundit e akorduar nga Ilir Meta i përket nëntorit të vitit 2017.

Megjithatë, e vërteta është krejt ndryshe. Prej dy vitesh, “qokat” me dekoratat kanë kaluar çdo limit.

Një investigim gazetaresk ka zbuluar se vetëm në vitin 2019, në faqen e Presidencës janë publikuar emrat e 24 përfituesve të titullit të lartë të “Kalorësit të Urdhërit të Skëndërbeut”.

Presidenca.al nuk ka asnjë detyrim që të publikojë në faqen e saj të gjithë përfituesit, ndaj lista mund të jetë shumë më e gjatë.

Por “Kalorësi i Urdhërit të Skëndërbeut” është një medalje e rrallë, që jepet, sipas përcaktimit ligjor të ligjit të dekoratave, vetëm për akte heroike në mbrojtjen e Republikës së Shqipërisë.

http://www.vendime.al/wp-content/uploads/2017/05/Ligj-nr.112-dat%C3%AB-4.4.2013-i-perditesuar.pdf

Mes përfituesve të kësaj medalje, në 21 gusht 2019 ishte edhe ambasadorja në largim e Republikës së Greqisë, Eleni Sourani.

Znj.Sourani në vitin 2016 mohoi ekzistencën e çështjes çame, kurse në 2018-ën, denoncoi e quajti “vrasje shtetërore”, atë të komandos Kacifa, i cili mbeti i vrarë në një shkëmbim zjarri me forcat e rendit në jug të Shqipërisë.

Pa paragjykuar figurën e ambasadores, e cila pavarësisht avokatisë së natyrshme që i bën vendit të saj mund të ketë dhënë një kontribut të rëndësishëm në forcimin e marrëdhënieve dypalëshe, natyrshëm shtrohet pyetja në duhet të dekorohej me të vërtetë kjo diplomate pikërisht me një medalje që posaçërisht vlerëson “aktet heroike” në mbrojtje të Shqipërisë?

Një konsideratë e tillë ngre një shqetësim edhe më të madh. Në Shqipëri nuk abuzohet vetëm me shpërndarje e dekoratave, por edhe me përcaktimet ligjore për dhënien e tyre – raporton portali Lexo.al

E nëse kjo tek shtetasit e huaj nuk ka ndonjë impakt, tek shtetasit shqiptarë duket shpesh e qëllimshme, për t’i lejuar ata të përfitojnë nga masa e pensionit të posaçëm apo benefiteve të tjera të njohura nga ligji.

Presidenti është kompetent për akordimin e 12 titujve, urdhërave e dekoratave të ndryshme. Konkretisht, Presidenti akordon “Dekoratën e Flamurit Kombëtar”, dekoratën “Gjergj Kastriot Skëndërbeu”, dekoratën “Nderi i Kombit”, dekoratën “Nënë Tereza”, dekoratën “E artë të Shqiponjës”, titullin “Pishtar i Demokracisë”, titullin “Kalorës i Urdhërit të Skëndërbeut”, titullin “Kalorës i urdhërit të flamurit”, titujt “Martir i Demokracisë”, “Mjeshtër i Madh”, “Naim Frashëri”, “Për Merita të veçanta civile” dhe “Për Shërbime Ushtarake”.

Ligji për ISSHP, njeh të drejtën e personave të dekoruar për të përfituar pensione të posaçme, që miratohen me VKM dhe që përgjithësisht fillojnë në 500 mijë lekë të vjetra mujore e më shumë.

https://arsimi.gov.al/wp-content/uploads/2018/02/ligji_Sigurimet_shoqerore_dhe_Shendetsore_ne_RSH.pdf

Shumë nga personat e dekoruar meritojnë absolutisht titullin e akorduar.

Por, në dhjetëra apo qindra raste të tjera, ekziston dyshimi që persona pa asnjë meritë të spikatur përfitojnë tituj me qëllimin e vetëm për të përfituar financiarisht.

Sipas portalit të sipërcituar fatura që taksapaguesit përballojnë çdo vit për pensionet e posaçme klienteliste avitet në miliona dollarë në vit.

e.ll./dita