Kë Nishan të besojmë, atë të 2010 apo atë të 2014?

Nga Arben Isaraj

Në 2010-ën, Bujar Nishani, ministër i Drejtësisë demokrate, pasi votoi në Qeveri për ndryshimin e kufijve territorialë të Shqipërisë, me gjuhën e “Kushtetutës” tha përpara Gjykatës edhe këto dy rreshta “fondamentale” :

1​- Konsultimi publik nuk është standard kushtetues, por lidhet me vullnetin politik, prandaj nuk mund të jetë shkak i tillë që të mund ta bëjë marrëveshjen antikushtetuese. Ky pretendim mund të ngrihet në rrugën politike të shprehjes së mendimit, konkretisht gjatë procedurave parlamentare. Kërkuesi i ka të gjitha mundësitë që në rrugë parlamentare të realizojë procesin e konsultimit, i cili, sipas tij, ka munguar në lidhjen e kësaj marrëveshje.​

2- Nuk qëndron pretendimi për mungesë informimi dhe transparence, pasi vetë kërkuesi nuk ka pranuar të marrë pjesë në punimet e parlamentit. Është kjo arsyeja që ai nuk ka pasur mundësi të njihet nga afër me dokumentacionin lidhur me përgatitjen, negocimin dhe nënshkrimin e marrëveshjes…….*

Sot, ish- ministri i Drejtësisë, që dje ndryshoi kufinjtë e Shqipërisë pa pyetur shqiptarët, si kryekomunar i PD-së kërkon që:

“Kufijtë e bashkive dhe komunave, nuk mund të ndryshohen pa u marrë me parë mendimi i popullsisë që banon në to”.

O zoti “kryekomunar”, sovraniteti në Republikën e Shqipërisë i përket popullit. Populli e ushtron sovranitetin nëpërmjet përfaqësuesve të tij ose drejtpërsëdrejti – thotë Kushtetuta.

Mirë ne, që në 6 muaj e ca e pyetëm sovranin në tryeza të përbashkëta, me përfaqësuesit e tij qëndrorë e vendorë, po ju si e pyetët drejtpërsëdrejti atë çfarë mendonte??!!

Kujt Nishani t’i besojmë?

Cilit integriteti, kushtetues, ligjor, moral, shoqëror e politik t’i besojmë?

Atij të kryekomunarit të PD-së !?

Largqoftë, ky flet me shpirtin dhe zërin e Qoftëlargut…

* Mbrojtja e Qeverisë Berisha përpara Gjykatës Kushtetuese, për të ashtëquajturën “Marrëveshja e Detit”. Shih: Vendimi nr. 15, datë 15.04.2010 (V – 15/10)