“Keit të veshë vetëm funde të gjata”

Nuk do të ketë më minifunde dhe efekte “á la Merlin Monro” për dukeshën e Kembrixhit, Keit Midelton. Mbretëresha Elisbetë i ka imponuar disa argumente asaj disa vërtet të pakëndshme 2 muaj para turit që do të zhvillojnë nëpër Australi, shkruante “Mail on Sunday” dje. Për të promovuar fuqinë e monarkisë angleze edhe jashtë kufijve të saj, princeshës bukuroshe do t’i duhet të bëjë disa ndryshime drastike në garderobë, duke zgjatur të gjitha fundet e saj për të shmangur pakënaqësinë e mbretëreshës. Dikur veshjet “e guximshme” të Keit nëpër vizita zyrtare, ku binin në sy fundet disa centimetra mbi gju, kishin tërhequr vëmendjen e tabloidëve që komentonin (ndër të tjera) edhe bukurinë e këmbëve të saj. Rasti i fundit ishte më 19 dhjetor, kur dukesha u prezantua në një event bamirësie me një xhaketë të errët dhe një fund me pala aq të shkurtër, sa kur u përkul për të përshëndetur vogëlushen që e priste me lule, era ia fluturoi palat duke zbuluar plotësisht këmbët “kilometrike” të saj. Por Elisabeta i ka marrë masat njëherë e mirë, duke i prezantuar Keitit stilisten e saj personale,  Angela Kelly. Dhe nuk mbaron me kaq, sepse princesha sensuale do të duhet të heqë dorë nga pasioni për veshjet me çmim të ulët, e sidomos nga bizhuteritë e lira. Sovrania i ka huazuar dukeshës disa nga bizhuteritë më të bukura të koleksionit mbretëror.

Me drojën se mos nxit zemërimin e saj, Keit ka ngarkuar stilistët Aleksander Mekuin dhe Elis Temperli të krijojnë për të veshje që respektojnë sa më shumë diktatin e mbretëreshës. Në një pikë të vetme Midelton tregohet e palëkundur: floktorja e saj personale, Amanda Kuk Tuker, do ta ndjekë gjatë udhëtimit në Australi, në mënyrë që flokët, burim adhurimi për shumë, të jenë të patëmeta ashtu siç jemi mësuar t’i shohim.