KËNGËT E BREGOVICIT DHE “KËMBORËT” E FAZLLICIT

Kanë kaluar disa vite nga koha kur këngëtarit boshnjak Goran Bregoviçit ju akordua nga ish kryebashkiaku i Tiranës, Edi Rama, çelësi i kryeqytetit, një gjest simbolik ky, në nderim të njerëzvë të shquar në fusha të ndryshme të jetës kulturore, shoqërore apo shkencore. Siç është edhe ky këngëtar i shquar jo vetëm në interpretime por edhe në krijimtarinë e gjerë muzikore, i njohur botërisht për performancën e tij të jashtëzakonshme. Në fakt, prej at’here, s’kanë rreshtur anatemimet dhe akuzat e megafonëve të PD ndaj zotit Rama se thua na qënka bërë nami e na paska nderuar një njeri që me këngën e tij i ka dhënë zemër Milosheviçit, çetnikëve serbë e genocidit në Kosovë.

E kishim harruar ca kohë këtë akuzë por u desh vizita e Kryeministrit të ri të Shqipërisë në Kosovë që ta dëgjojmë përsëri e ndonse përsëri me mendjen e Berishës të artikuluar me gurmazin e deputetit Bogdani.

Siç duket, shpurën demokratikase vizita e menjëherëshme e Kryeministrit Rama në anën tjetër të Drinit, në Kosovë, duket se e ka zënë keqaz në befasi. Një vizitë jo vetëm e merituar por tejet e mirëmenduar dhe nëse kryeministri i ri i vendit përpëra akreditimit pati rastin të vizitojë shtete me fuqi të mëdha europiane e botërore, pas akreditimit, të parën vizitë e zhvilloi në shtetin e vëllezërve të një gjaku e të të njëjtave troje.  Vizitë sa simbolike po aq edhe vizionare  për të sotmen dhe të ardhmen e dy shteteve të një kombi.

Vizitë me një axhendë të qartë e të saktë ku u dhanë mesazhe të jashtëzakonshme jo thjesht e vetëm bashkëpunimi por ku u publikuan edhe disa prej piketave të një rruge të përbashkët zhvillimi, unifikimi e europianizimi.

Të kuptueshme ky egërsim dhe balta e anatemimet që vijnë. Sulmet bëhen pikërisht nga ata që deri dje Kosovën e trajtonin si të përgjëruarën për “ Skënderbeun” Berisha dhe se , sipas tyre, dashuria për kosovarët duhet të kalonte e të kalojë ende nga lesa e vathës së selisë blu. Cinike dhe e pa precedent kjo mënyrë sjellje kur në vënd të përshëndetjes apo një fjale të mirë për këtë veprim të mençur të kryeministrit Rama gjejnë përsëri “vjegën” e Bregoviçit për të varur “thesin” e tyre të tejmbushur me akuza e sharje.

Në këto radhë  nuk marr përsipër të komentoj repertorin e këtij këngëtari të adhuruar nga miliona fansa anë e mbanë botës por marr guximin të them se me ndonjë këngë të tij mund të ngrohen ca zemra por kurrsesi nuk mund të ndizen e të ecin tanke lufte, siç ndodhi me naftën që udhëheqësi i deridjeshëm i demokratëve Berisha furnizoi makineritë luftarake të Milosheviçit, duke thyer embargon e vendosur prerë nga komuniteti ndërkombëtar.

Ky që po them është një fakt i njohur ndërkombëtarisht dhe nga të gjithë për kohën e luftës së Kosovës dhe të lësh mënjanë këtë akt tradhëtie  e të kapesh pas një kënge apo këngëtari kjo është sa e turpshme aq edhe qesharake.

Vetëm drejtuesit e kësaj force politike të sapondëshkuar rëndë nga populli vazhdojnë ta trajtojnë popullin si pa memorje e pa vetëdije. Dhe, nëse dikush duhet të heshti për këtë fakt të pakundërshtueshëm  si dhe për  sjellje të tjera në raport me luftën e Kosovës e luftëtarët e saj ky duhet të jetë lidershipi i vjetër dhe i ri i Partisë Demokratike.

Po ndërsa dëgjoj që zëdhënësat e opozitës së re të vendit anatemojnë Ramën për mirësjelljen ndaj një këngëtari si Bregoviç më fanepset menjëherë një tjetër patriot i këngëtarit, Damir Fazlliç.

Kënga e Bregoviçit s’është gjë fare përpara “këmborëve” të Fazlliçit, një mik e bashkëpuntor me bashkëpuntorët e Milosheviçit i cili pasi bëri e ç’nuk bëri në këtë tokën shqiptare “një euroshe” kulmin e arriti kur ju desh të drejtojë edhe mbledhje qeverie.

Kësaj i thonë; ku Bregoviçi e ku Fazlliçi e po të zgjatemi dhe një çikë, ku embargoja e thyer për furnizimin e tankeve të Milosheviçit.