Kërcënimi i fundit, dhe më tradicional për Berishën, është ai gjeopolitik. Sa herë ai ngel në krizë dhe gjendet para izolimit të Perëndimit, armën e vetme që ka kundër tij, është paraqitja e tij si Babai i Kombit dhe shpalosja e retorikës nacionaliste. Ideja e tij për 10 milion pasaporta shqiptare është qartazi një shenjë për t’i treguar Perëndimit se ka një ushtri me dhjetë milion njerëz në rajon dhe duhet konsideruar si faktor me të cilin mund të bisedohet dhe t’i tolerohet mungesa e demokracisë dhe lirisë në vend të vet.
Është ekzaktësisht ajo që bënte Milosheviçi, i cili në përpjekje për tu pranuar nga Perëndimi destabilizoi gjithë ish- Jugosllavinë, ngriti peshë nacionalizmin e vjetër serb dhe në fund e bëri Serbinë më të vogël seç ishte dhe çfarë do të ishte nëse nuk do ishte në krye të vendit Milosheviçi.
Sali Berisha po bën të njëjtën gjë. Për të shpëtuar karrigen e vet, ai po kërcënon politikisht, financiarisht dhe gjeopolitikisht, në përpjekje për tu konsideruar faktor i vetëm, me të cilin mund të bisedohet në Shqipëri. Ai kërkon të faktorizohet si e keqe e domosdoshme, si një njeri që ka në dorë kartën e tij të fundit “pas meje qameti!”.
Email nga adresa: [email protected]