Kërkohet arrestimi i Bllakos, Rama mbledh sot Kryesinë e PS

Kryeministri Edi Rama do të mbledhë ditën e sotme Kryesinë e Partisë Socialiste.

Mbledhja pritet të zhvillohet në orën 17:00 në selinë rozë. Ditën e djeshme, kreu i qeverisë zhvilloi një takim me disa investitorë pranë Kryesisë së Kuvendit, tek Vila 31 në zonën e ish-Bllokut.

Mbledhja e Kryesisë së PS-së vjen një ditë pasi Prokuroria e Posaçme Kundër Korrupsionit të Krimit të Organizuar (SPAK) ka depozituar në Kuvend kërkesën për arrestimin e deputetit të Partisë Socialiste Alqi Bllako.

Ky i fundit, pasi Prokuroria e Posaçme kundër Korrupsionit dhe Krimit të Organizuar lëshoi urdhër-arrestin ndaj tij bëri me dije se ka lëshuar mandatin e tij si deputet i Partisë Socialiste, duke shtuar se nuk ka nevojë që Kuvendi i Shqipërisë të mblidhet për t’i hequr mandatin.

Sipas SPAK shkelja e Bllakos qëndron në shpronësimi i tokës për inceneratorin e Fierit.

Në dokument shkruhet se Koka, Bllako dhe Abeshi përgatitën dokumente false për shpronësimin e tokës për inceneratorin e Fierit duke i shkaktuar dëm shtetit mbi 16 mln lekë për ta kthyer nga tokë arë në truall.

Nga hetimet sipas SPAK ka rezultuar të dhëna se në procedurën e dhënies së koncesionit dhe në lidhjen e kontratës janë shkelur ligji për koncesionet dhe prokurorimin publik.

j.l./ dita