Pas zvarritjesh për një kohë të gjatë, Gjykata e Apelit në Shkodër ka dhënë vendimin për pushimin e çështjes fermerëve të Shkrelit, të cilët akuzoheshin për kultivim të lëndëve narkotike. Apeli ka hedhur poshtë kështu vendimin e gjykatës së shkallës së parë.
Fermerët e Shkrelit kishin apeluar vendimin e Gjykatës së Shkallës së Parë, e cila në 13 mars 2012 i shpalli fajtorë duke i dënuar me gjoba dhe burgim deri në 7 vjet. Në vendimin e saj Gjykata e Shkodrës i cilësonte 53 fermerët shkodranë si organizatë kriminale, e cila është marrë me kultivimin e bimëve narkotike dhe jo me kërp industrial që pretendohet prej tyre.
Odiseja e gjyqeve për fermerët e Shkrelit ka nisur që në vitin 2000. Janë 12 vite seanca pa fund, nga të cilat, herë dalin fitues fermerët e herë Ministria e Brendshme. Banorët e Shkrelit akuzohen se nuk kultivojnë kërp, por kanabis. Ngjashmëria midis këtyre të dyjave ka sjellë edhe betejën ligjore të fermerëve prej 12 vitesh.