Kina SHBA-së: Larg Hong Kong-ut

Të premten, Kina zyrtare thirri përfaqësuesin diplomatik amerikan në Pekin për t’i shprehur pakënaqësinë ndaj komenteve të Uashingtonit zyrtar për çështjen e debatueshme të ligjit të ekstradimit të Hong Kongut.

Zëvendës Ministri i Jashtëm Le Yucheng thirri në takim Robert Forden, Zëvendës Shef i Misionit amerikan në Pekin, për të dorëzuar notën e protestës, thuhet në një deklaratë të Ministrisë së Jashtme kineze.

Në të njëjtën kohë zëvendës ministri theksoi se Kina nuk pranon ndërhyrjen e fuqive të huaja në çështjet e Hong Kongut. Në deklaratë thuhet se “Kina i bëri thirrje Shteteve të Bashkuara… të ndalin menjëherë të gjitha ndërhyrjet në çështjet e Hong Kongut dhe të ndalin veprimet që mund të ndikojnë në begatinë dhe stabilitetin e Hong Kongut”.

Zëdhënësi i Ministrisë së Jashtme kineze, Geng Shuang, u shpreh se çdo përpjekje për të shkaktuar kaos në Hong Kong nuk do të ketë sukses. Komentet u bënë pasi ligjvënësit amerikanë propozuan të enjten legjislacionin në bazë të të cilit do t’i kërkohej Sekretarit amerikan të Shtetit të çertifikojë çdo vit autonominë e Hong Kongut, si parakusht për përfitimin nga ligji i viti 1992 për trajtimin e veçantë.

Pekini paralajmëroi Shtetet e Bashkuara të mos ndërhyjnë në situatën e tanishme në Hong Kong, të cilën e konsideron çështje të brendshme kineze.

Kujtojmë se si Dita, pati raportua, rreth 1 milionë njerëz kanë dalë në rrugët e Hong Kongut për të protestuar kundër ndërhyrjes në rritje të Pekinit tek autonomia dhe shteti ligjor i Hong Kongut si dhe ligjin e ekstradimit. Ata janë përballur me dhunë policore.

e.ll./dita