Ku kanë lindur krerët e rinj të Policisë së Shtetit (dhe një kujtesë Sokolit)

Artan Didi, Drejtor i Përgjithshëm i Policisë

Datëlindja 22.09.1963, Vendlindja Tiranë

 

Ardian Çipa, Drejtor i Drejtorisë së Policisë së Qarkut Tiranë.

Datëlindja 14.09.1976, vendlindja Himarë

 

Kastriot Skënderaj, Drejtor i Drejtorisë Policisë së  Qarkut Vlorë

Datëlindja 03.02.1968, vendlindja Cakran Fier

 

Ervin Hodaj, Drejtor i Drejtorise  së Qarkut Fier

Datëlindja 15.06.1976, Vendlindja Tepelenë

 

Haki Çako, Drejtor i Drejtorisë së Qarkut Gjirokastër

Datëlindja 27.03.1952, Vendlindja Berat

 

Lorenc Panganika, Drejtor i Drejtorisë së Qarkut Berat

Datëlindja 24.06.1972, Vendlindja Korçë

 

Ilirjan Balla, Drejtor i Drejtorise së Qarkut Kukës

Datëlindja 21.11.1972, Vendlindja Durrës

 

Perlat Vatoci, Drejtor i Drejtorise së Qarkut Dibër

Datëlindja 23.01.1976, Vendlindja Tropojë

 

Edmond Tarkaj, Drejtor i Drejtorise së Qarkut Korçë

Datëlindja 05.06.1966, Vendlindja Tepelenë

 

Perlat Çullhaj, Drejtor i Policisë së Qarkut Durrës

Datëlindja 10.09.1970, Vendlindja Gjirokastër

 

Shaban Nexhi, Drejtor i Policisë së Qarkut Shkodër

Datëlindja 01.09.1970, Vendlindja Kukës

 

Niko Brahimaj, Drejtor i Policisë së Qarkut Lezhë

Datëlindja 27.05.1960, Vendlindja Vlorë

 

Neritan Nallbati, Drejtor i Policisë së Qarkut Elbasan

Datëlindja 24.06.1969, Vendlindja Korçë

 

*******

“Klani Tepelena” në polici dhe një kujtesë për Kolin

 

Dje Ish- ministri i Brendshëm, Sokol Olldashi,  deklaroi  se drejtori i ri i Policisë së Shtetit është emëruar në shkelje të ligjit për Policinë e Shtetit. Olldashi tha se Artan Didi nuk plotëson tre kriteret kryesore për të qenë drejtues i Policisë së Shtetit, sipas tij Didi nuk ka shkollimin e duhur, gradën e nevojshme dhe eksperiencën në vite pune.  Duke folur për ABC Neës, Olldashi shkoi shumë larg… kur tha se policia tani po mbushet me tepelenas. Ai rreshtoi disa emra nga Tepelena, që janë emëruar në detyra të larta në polici, me në krye Didin.  E thënë nga Sokol Olldashi ky është një prononcim tejet i rëndësishëm. Së pari sepse Sokol Olldashi është njeriu i fshesës më spektakolare të ndërmarrë ndonjëherë në policinë e shtetit të nisur në vitin 2005. Skema funksiononte me një logjikë primitive dhe një kusht të padëgjuar më parë:  të gjithë drejtuesit që kishin fituar gradat, mund të mbanin gradën dhe të dilnin në lirim ose të hiqnin dorë nga grada dhe të degdiseshin në pozicione më të ulëta. Ishte një reformë-olldashiane e padëgjuar, grada është titull, që fitohet dhe titullari e disponon deri në vdekje. Nuk është diçka që mund të “heqësh dorë”. Por ja që Koli ia nisi fshesës në vitin 2005 dhe  qindra ekspertë dhe drejtues policie e panë veten në rrugë. U zëvendësuan sigurisht, me njerëz që nuk kishin kualifikimin, por që në kohë rekord u pajisën me grada të printuara me urgjencë. Është Sokol Olldashi njeriu që ishte në krye të kësaj ministrie kur ndodhi ky spastrim antiligjor në vitin 2005. Por le të rikthehemi pak tek “çështja Tepelena”

Tepelena si sebep

Nga 13 drejtues kryesorë të policisë të emëruar rishtas(listën e gjeni të plotë me specifikime) vetëm 2 prej tyre rezultojnë me vendlindje në zonën e Tepelenës. Të tjerët janë nga qytete të tjera të Shqipërisë, Berat, Korçë, Fier, Vlorë Kukës, Tropojë etj. Po përse kërkon të ndërtojë tymnajën “Tepelena” Koli? Pikësëpari për të bërë atë që ka bërë gjithë kohës babai i tij shpirtëror: Të radikalizojë ndarjen veri-jug për të kapur bastione në veri. Së dyti, për të relativizuar një fakt të ditur botërisht gjatë qeverisjes se demokratëve: Rangjet e policisë u mbushën vetëm me kuadro nga Tropoja dhe Kukësi. Gazeta “DITA” ka botuar pak kohë më parë një listë të plotë të këtyre zyrtarëve, por problemi nuk ishte se 98 për qind e drejtuesve në polici ishin nga këto dy zona, por se shumica e tyre ishin lidhje direkte, okulte dhe njerëzish krejtësisht nën hyqmën e Agron Kuliçajt dhe Flamur Nokës. Asgjë më tepër se kaq nuk përfaqësonin, ishin graduar me emergjencë por në fakt përfaqësonin thjesht “tarafin e Gonit”. Por që Koli të mos ketë më dilema po i risjellim në vëmendje një raport të institutit të specializuar PAMECA që mbikëqyr policinë shqiptare. Raporti është i  fund vitit 2012 dhe tregon qartë se në çfarë derexheje përfundoi policia si pasojë e reformave demokratikase-olldashiane-gonkuliçase. Lexoje Koli, e pasi ta lexosh mos pyet se nga janë ish-drejtuesit e policisë që e degraduan në këtë farë feje policinë, por  thjesht pyet veten: Sa shqiptarë kanë humbur jetën dhe pronën në 8 vite si pasojë e kësaj policie që ti e reformove olldashërisht në vitin 2005?

 

Pjesë nga raporti i PAMECA për policinë i botuar në Nëntor 2012

 

Paga e 13-të

Punonjësi i policisë nuk përfiton pagën e 13-të në fund të vitit, sipas ligjit “Për Policinë e Shtetit” ku përcaktohet se “Punonjësit e policisë përfitojnë çdo vit, në fund të vitit financiar një shpërblim deri në një pagë mujore……Punonjësit që nuk kanë mungesa në punë për çfarëdo arsye, përveç kohës së pushimit, kanë të drejtën e shpërblimit të plotë”.

 

Ulja e pagës

Me ndryshimet legjislative  në policinë e shtetit në vitin 2007, një pjesë e mirë e punonjësve pësuan ulje në pagë si rezultat i implementimit të pagave. Konkretisht punonjësit që ishin me gradën Kryeinspektor(rreth 12% e punonjësve të policisë) si rezultat i këtij ndryshimi pësuan ulje të ndjeshme në pagë në masën 10%. (Paga e Kryeinspektorit në vitin 2008 ishte 59.780 lekë ndërkohë që paga e nënkomisarit në Korrik 2008 u bë 53.800 lekë)

 

Agjentët e infiltruar

Nisur nga ambienti ku punojnë këta  punonjës policie të infiltruar, ekziston gjithnjë mundësia e “kontaminimit” të tyre nga sjellje kriminale për shkak të përfitimit financiar dhe një alternativë për të shmangur këtë pasojë është kompesimi i tyre financiar duke përfshirë dhe komoditete të tjera që i jepen atij për shkak të detyrës që kryejnë.

 

Transferimet

Megjithëse në rastet e transferimeve punonjësit e policisë përfitojnë trajtim financiar për largësinë nga vendbanimi , trajtimi financiar është në masën e 30% të shumës së harxhuar për shpenzime udhëtimi. Gjithashtu në rastet e transferimit, bashkëshorti/ja e punonjësit të policisë trajtohet financiarisht për kohën e qëndrimit pa punë, por masa e trajtimit financiar është 50% më e ulët se paga që do të merrte nëse do të vazhdonte në marrëdhënie pune.

 

Me turne

Për punonjësit e policisë që punojnë me turne (rreth 76.32%) përveç kostos financiare të udhëtimit, ata shpenzojnë rreth 2-3 orë në ditë për të vajtur në qendrën e punës. Kohë e cila nuk paguhet dhe ndikon në gjendjen fizike të punonjësve.

 

Demotivimi

Punonjësit e policisë me pagën aktuale nuk janë të motivuar, pasi trajtimi financiar nuk plotëson nevojat minimale të tyre, kjo duke marrë parasysh koston e lartë të jetesës, punën jashtë vendbanimit gjendjen familjare të punonjësve etj.

 

Përgjysmimi

Një element tjetër i rritjes së ngarkesës në punë të punonjësve të policisë është fakti se nga viti 1991 numri i punonjësve të policisë është reduktuar nga 1 punonjës për 200 banorë në 1 punonjës për 445 banorë. Ky reduktim prej 55% i numrit të punonjësve ka ndodhur edhe pse detyrimet e Policisë së Shtetit janë shtuar për të përballuar nivelin në rritje të krimeve, sidomos të krimit të organizuar dhe për plotësimin e rekomandimeve për antarësimin në strukturat e BE-së.