KLD shfajëson Çefën: Vendimet ishin kolegjiale

Këshilli i Lartë i Drejtësisë, pas kërkesës së 39 deputetëve për shkarkimin e  Elvis Çefes, zëvendëskryetar i KLD dhe anëtarit tjetër të KLD, Lulzim Lelcaj, i ka dërguar një relacion shpjegues deputetëve.

Burime nga KLD bëjnë të ditur se Këshilli i Lartë i Drejtësisë, konstaton se vendimet në Këshill janë marrë me shumicën e votave të anëtarëve të tij. Në këtë këndvështrim, pavarësisht se në kërkesë nuk e është shprehur, deputetët që kanë nënshkruar këtë kërkesë, konkludojnë se KLD në tërësi ka shkelur ligjin. Pra deputetët kanë gjykuar si të paligjshme disa vendimmarrje kolegjiale të një organi që i përket një pushteti tjetër, atij gjyqësor, të një organi kushtetueshmërisht të pavarur dhe të ndarë qartazi nga dy pushtetet e tjera, legjislativi dhe ekzekutivi.

Këshili sqaron se ka proceduar me zëvendësimin e gjyqtarit Sokol Binaj nga Këshilli Drejtues i Shkollës së Magjistraturës, për shkak të qëndrimeve të tij jo etike të relatuara në KLD edhe nga Kryetari i Gjykatës së Lartë, njëherazi edhe Kryetar i Bordit Këshillit Drejtues të Shkollës së Magjistraturës. Nuk është parashikuar për asnjë moment në asnjë ligj ndalim për një veprim të tillë. Problematika e hasur dhe e parashtruar shpeshherë nëpërmjet diskutimeve të anëtarëve gjatë seancave plenare të KLD, për ecurinë e shkollës së Magjistraturës, ka vënë në dukje nevojën e ndryshimit të drejtorit të asaj shkolle. Zoti Fana është emëruar në atë detyrë pasi kishte përfunduar mandatin e tij si anëtar i Këshillit të Lartë të Drejtësisë dhe është gjykuar se ka qënë një kandidaturë e cila përveçse plotësonte më së miri kriteret formale të ligjit, ka pasur edhe një eksperiecë mjaft të pasur në këtë fushë, pikërisht për shkak të qënies anëtar i KLD.

Këshilli në të gjitha rastet e trajtimit të kërkesave të ndryshme të gjyqtarëve dhe në mënyrë të veçantë gjatë procesit të emërimit të tyre, ka mbajtur një qëndrim rigorozisht jashtë çdo influence politike. Në përzgjedhjen e gjyqtarëve, kriteri dominant i marrë në konsideratë nga KLD ka qenë statusi i gjyqtarit, aftësia profesionale dhe integriteti personal i personit. Përveç emërimit të zj. Enkelejdi Hajro (magjistratë dhe ish-gjyqtare), përmendim këtu qëndrimin e KLD në rastin e riemërimit si gjyqtar në gjykatën e shkallës së parë Tiranë të z. Artan Lazaj, i cili ishte përfaqësues politik i Partisë Socialiste në KQZ.