KLD vijon përndjekjen ndaj Ina Ramës: Përjashton gjyqtaren e çështjes

Duket se procesi gjyqësor i hapur nga ish-Prokurorja e Përgjithshme, Ina Rama, kundër Këshillit të Lartë të Drejtësisë, ka premisa të qëndrojë në udhëkryq. Shkak pritet të bëhet seanca në Gjykatën Administrative, ku me kërkesë të KLD-së gjyqtarja që kishte çështjen Enrjeta Shehaj, u përjashtua nga gjykimi me një vendim të një tjetër kolegeje të saj. Ç’ka do të thotë se padia e depozituar në fillim të muajit prill do të rihidhet në short, për të vendosur një tjetër trupë gjyqësore. Të ndodhur në këtë pikë, avokati i Ina Ramës, Fatmir Braka e shikon si ndikim të KLD-së përjashtimin e gjyqtares Shehaj, pasi tre vjet më parë Këshilli i Prokurorisë e më pas ish-Prokurorja e Përgjithshme, vendosi emërimin si prokuror i bashkëshortit të gjyqtares, Erjon Shehaj. Avokati Braka kundërshton vendimin, duke shpjeguar se me argumentin e konfliktit të interesave edhe pala paditëse do të kërkojë dorëheqjen e të gjithë gjyqtarëve të Gjykatës Administrative. “E quaj tmerrësisht absurde dhe të padrejtë, faktin që të përjashtosh një gjyqtare, se burri i saj është emëruar prokuror nga një tjetër, kur në rastin konkret, dhe nuk është vendimmarrësja Ina Rama, por është Presidenti i Republikës, për emërimin e Prokurorëve. Këta gjyqtarë të Gjykatës Administrative janë emëruar të gjithë nga KLD-ja dhe po të ecim me arsyetimin që bën KLD-ja, që gjyqtarët duhet të kenë shkaqe njëanshmërie, kur burrat e tyre emërohen në një vend, siç është rasti i prokurores të përgjithshme, atëherë ç’thuhet për këta gjyqtarë, që direkt janë emëruar nga KLD-ja dhe nga Presidenti i Republikës, me vendimmarrjen e të dyve? Ky proces kështu futet në rreth vicioz”, thotë avokati në një prononcim për TCH.

Padia

Ish-Prokurorja e Përgjithshme në vitet 2007-2012, i kërkon Gjykatës Administrative ta detyrojë KLD-në që ta emërojë si gjyqtare pranë Gjykatës së Apelit Tiranë, të paguajë të gjitha pagat që ajo duhet të merrte nga dhjetori 2012 e në vijim, si edhe t’i dëmshpërblejë dëmin moral të shkaktuar nga disa anëtarë për fyerje gjatë mbledhjes së KLD-së. Rama thekson në padinë e saj se KLD-ja duhet të vendoste për emërimin në Gjykatën e Apelit jo vetëm në referim të ligjit, por edhe nisur nga vendet vakante në këtë gjykatë, e aq më tepër, që sipas ish-kreut të akuzës, vetë anëtarët e KLD-së kur refuzuan kërkesën e saj për t’ju kthyer gjyqësorit, e morën këtë vendim në konflikt interesi të qartë, pasi disa prej tyre vijojnë të jenë edhe gjyqtarë në Gjykatën e Apelit, ku Rama kërkon të rikthehet.