Jurgen Klop po përjeton sezonin më të keq të karrierës së tij, pas tre të mëparshmëve me një ecuri fantastike. Sezoni aktual ka qenë tepër i vështirë, për shkak të një numri të madh dëmtimesh, si në asnjë skuadër tjetër. Humels, Subotiç, Pishçek, Shmelcer dhe Gundogan janë mungesat e mëdha. “Dëmtimet na kanë dobësuar shumë, duke bërë që ky sezon të jetë më i vështiri në karrierën time”, thotë Klop. “Është e vërtetë kur njerëzit thonë se dëmtimet e shumta prishin edhe stilin tonë të lojës. Mjafton të shikoni se cilët lojtarë nuk luajnë për të kuptuar se sa e vërtetë është kjo gjë. Lajmi më i mirë në situatë është zbulimi i lojtarëve si Erik Durm, Marian Sarr e Jonas Hofman, të cilët kanë pasur mundësinë të konfirmohen në Bundesligë”. Edhe pse lavdëron të rinjtë, Klop u rikthehet të dëmtuarve, pasi ata përbëjnë forcën e vërtetë të verdhezinjve: “Gjithë boshti drejtues është i dëmtuar. Ata janë lojtarë që ndryshojnë rrjedhën e lojës dhe kjo nuk është pak. Dy qendërmbrojtës, dy mesfushorë dhe dy mesfushorë të tjerë me tipare mbrojtëse. Mungesa e tyre ndryshon gjithë strukturën e ekipit”. Në këto kushte, pauza dimërore është më se e mirëpritur dhe në pranverën e ardhshme trajneri shpreson që të ketë sërish në dispozicion skuadrën e mrekullive.