KLSH kërkon ndjekjen penale të ish-kryetarit të Bashkisë së Përmetit, për shpërdorim detyre. Kontrolli i Lartë i Shtetit ka depozituar sot në prokurori një kallëzim penal për Edmond Kominon, ish-kryebashkiak i Përmetit. Sipas KLSH, gjatë kontrolleve në Bashkinë e Përmetit janë konstatuar shkelje lidhur me shitjen e trojeve brenda vijës kufizuese të qytetit të Përmetit, në kundërshtim të hapur me ligjin.
“Si pasojë e këtyre shkeljeve të konstatuara, Kontrolli i Lartë i Shtetit ka çuar në Prokurorinë e Rrethit për kallëzim penal, ish kryetarin e Bashkisë Përmet për periudhën 2008 -2011, me akuzën “Për shpërdorim detyre”, pasi në kundërshtim flagrant me ligjin ka nënshkruar aktin noterial të shitjes ndaj subjekteve private të pronës shtetërore (truall) ndonëse nga verifikimet e bëra gjatë procesit të auditimit rezultoi se pala shitëse Bashkia Përmet nuk ka qenë pronare e trojeve që ajo ka shitur me anë të kontratës noteriale”, thotë KLSH.
Gjithashtu, KLSH ka kallëzuar në organin e akuzës edhe drejtorin e shoqërisë Ujësjellës Kanalizime në Mat, kryetarin e Degës Teknike, kryetarin e Degës së Financës dhe dy ish-kryetaret e Degës së Financës së Ujësjellësit, të gjithë për shkelje të detyrës.
“Nga auditimi rezultoi që drejtori dhe shefat e financës (sipas periudhave) të kësaj ndërmarrjeje, nuk kanë regjistruar në kontabilitetin e shoqërisë të gjitha mallrat e ndodhura në magazinën e marrë në dorëzim në përfundim të punimeve nga Projekti Norvegjez; kanë kryer një sërë daljesh drejt subjekteve të ndryshëm fizikë dhe juridikë (në disa raste edhe ndaj subjekteve private), për të cilat mungojnë dokumentet justifikuese dhe vërtetuese për përdorimin e materialeve të bëra dalje, si dhe kanë nxjerrë urdhrat për këto dalje; të gjitha këto veprime në kundërshtim me ligjin”, bën të ditur KLSH.
KLSH vlerëson se dëmi financiar pasojë e këtyre veprimeve të kundrëligjshme është 18 628 898 lekë. Shifra në fjalë përfaqëson daljet në vlerë të materialeve nga magazina për periudhën 4 vjeçare 2007-2011, ku për të gjitha rastet mungojnë dokumentet justifikuese dhe vërtetuese për përdorimin e këtyre materialeve.