KOLLTUQET PJELLIN TARTABIQE

1. Miza dhe shqiponja
I thoshte një mizë shqiponjës,
plot shpezë në kthetra ti vure,
po gjer më sot asnjë mizë,
s’e zure dot-që s’e zure.

Ashtu vërtet-tha shqiponja,
ty fjalën as topi s’ta luan,
po sot mësoje-ta dish,
shqiponja për miza nuk gjuan!

2. Kolltuqet
Kam njohur burra shumë të ndershëm,
kur s’kishin grada dhe ofiqe,
ndryshuan kur u bënë ministra,
kolltuqet pjellin tartabiqe!

3. Kush rrëzohet
Po ratë si lisi në tokë,
ta dini se kaq e patët,
se dihet-në atë lis,
bëjnë dru edhe sakatët!

4. Përbindëshi
Tani nuk ka më përbindësha,
me gjashtë këmbë dhe dy kokë,
tani ata ecin ëmbël,
me dy këmbë përmbi tokë!

5. Kanë thënë…
Shpesh herë për t’i bërë portretin,
të ligut-ose të marrit,
gjithë të mençurit kanë thënë:
“Nxjerr të vdekurin prej varrit!”

6. Plehrat
Plehrat e qytetit mund të hiqen,
për një javë-e shumta një muaj,
po plehun në shpirtin e njerëzve,
kush mund ta pastrojë-më thua?!

7. Një proverb
Thotë një proverb i vjetër,
dhe nuk pranon diskutime:
“Budallai dhe dembeli,
nuk bëjnë kurrë gabime!”

8. E bardha e sorrës
Dhe po të kërkosh gjithë jetës,
do mundohesh ti më kot,
në të gjithë sorrat e Botës,
një pikë të bardhë nuk gjen dot!

9. Floriri
Burrin me mënd e me nder,
e shante një ordiner:
“E ç’vlera ke ti-i thosh,
këtu asgjë nuk të dihet?!”

“Ashtu vërtet-o kokëbosh,
po ari nuk vlen-ku nuk njihet!”

10. Zvarranikut
Çdo akt guximi që të nisësh,
ti e shikon gjithnjë me frikë,
se s’ke guxim që të braktisësh,
baltën ku rron-o zvarranik!