Komiteti Kombëtar i Veteranëve të LANÇ-it bën bilancin e 75-vjetorit

Gjikë Kurtiqi

Në ambientet  e ish kinema “Dajtit”, zhvilloi punimet mbledhja e Komitetit Kombëtar të Organizatës së Veteranëve të LANÇ. Veç anëtarëve të komitetit merrte pjesë edhe kryekëshilltari pranë Kryesisë së Komitetit Kombëtar, Kondradmirali Ziqiri Mero.

Kryetari i Komitetit Kombëtar, Rustem Peçi në fjalën e tij nënvizoi se viti 2019 ishte viti i 75 vjetorit të çlirimit të atdheut dhe i zhvillimit të konferencave të organizatave të veteranëve në rrethe. Do të shënohet në historinë e organizatës sonë niveli I realizimit me sukses të plotë të gjithë veprimtarive të planizuara në kuadrin e këtij përvjetori dhe në një vëmendje të veçantë nga Komisioni Qeveritar për festimin e 75 vjetorit të çlirimit, për zhvillimin e Konferencës Ndërkombëtare për LANÇ, për miratimin e Ditës së Veteranit të LANÇ dhe dhënien e dekoratës së lartë “Nderi i Kombit”, si dhe marrja e masave të lavdërueshme nga shumica e pushteteve vendore në rrethe. Duke ndjekur me vëmendje zhvillimet e situatave në vend dhe në rajon, kemi mbajtur qëndrimet tona me deklarata në shtyp.

Pas raportit nga sekretari i Përgjithshëm Odhise Porodini, folën Asllan Gropasi, Hetem Halili, Dhimitër Janaqi, Arqile Veshi dhe Ziqiri Mero, i cili dha disa këshilla tepër të vlefshme për punën e organizatës gjatë vitit 2020, duke u mbështetur në përvojën pozitive të këtij viti.

Pas diskutimeve kryetari Rustem Peçi bëri konkluzionet e mbledhjes, uroi pjesëmarrësit për festat e fundvitit dhe më pas Komiteti Kombëtar bëri disa kooptime. Në Komitetin Kombëtar, me propozim të kryetarit, u miratuan këta anëtarë të Komitetit Kombëtar:

Murat Dardha, Pëllumb Xhufi, Pjetër Ndreca, Dorjan Koçi, Ksenofon Krisafi, Sokol Sadushi, Vasil Mema, Veli Myftari, Vera Tarifa, Neim Saraçi, Beqir Boja dhe Xhevdet Shehu.

Komiteti Kombëtar kooptoi në Kryesinë e Komitetit Kombëtar edhe sekretarin e Komitetit të Veteranëve të Tiranës shokun Faik Guna.

Kryesia e Komitetit Kombëtar, nderoi me titullin e lartë: “Nderi i Organizatës së Veteranëve të LANÇ”, veteranët e LANÇ: Hiqmet dhe Sibe Zotaj (pas vdekjes) nga Ramica – Vlorë,

Nënkryetari i komitetit Asllan Gropasi lexoi motivacionin e titullit për veteranët Hiqmet dhe Sibe Zotaj. Bernard Zotaj, djali i veteranëve të shquar, falënderoi Kryesinë e Komitetit Kombëtar të Veteranëve për vlerësimin që ju bëri prindërve, si dhe premtoi angazhimin se djemtë dhe vajzat e tyre, nipat dhe mbesat, do të punojnë akoma më shumë për të rritur dhe lartësuar vlerat e luftës çlirimtare, si dhe të veteranëve dhe të pasardhësve të tyre. Tituj të lartë u dhanë edhe për profesorët: Ksenofon Krisafi, Moikom Zeqo, Sokol Sadushi, Pëllumb Xhufi, Dorjan Koçi dhe Fatos Tarifa.