Përfaqësuesit e kompanive të sigurimeve kërkojnë heqje të TVSH-së për këtë sektor dhe rregullim të tregut. Gjatë një takimi me Autoritetin e Konkurrencës, ishin siguruesit ata që propozuan heqjen e Tatimit mbi Vlerën e Shtuar për produktet e tyre. Sipas tyre, ekziston një vendim i gjykatës së Strasburgut që përcakton se policat e sigurimit nuk janë produkt final, por marrje e një përgjegjësie, ndaj për to nuk duhet paguar TVSH. Përfaqësuesit e kompanive u ankuan se tregu vazhdon të jetë me probleme dhe i parregulluar. Sipas tyre, primi i rrezikut apo kosto e sigurimit nuk duhet të jetë e njëjtë për të gjitha kompanitë. Autoriteti i Konkurrencës prezantoi gjithashtu një rregullore të re që do të lejojë marrëveshjet e siguruesve në funksion të llogaritjes së primit të rrezikut. Kryetarja e Komisionit të Konkurrencës Lindita Milo, tha se rregullorja do t’ju krijojë kompanive hapësira që të bashkëpunojnë për përcaktimin e primit të rrezikut, duke respektuar kufizime të caktuara që ky bashkëpunim të mos klasifikohet si marrëveshje e ndaluar. Rregullorja e hartuar nga Autoriteti i Konkurrencës vjen vetëm pak muaj pasi kompanitë e sigurimeve u gjobitën për marrëveshje të ndaluar në tregun e sigurimit të detyrueshëm motorrik. Rregullorja e re do t’ju lejojë kompanive të bashkëpunojnë për të caktuar primin e rrezikut, por jo për të përcaktuar çmimin final të primit të sigurimit.