Komunistët të zhgënjyer me qeverinë: Në një vit, vetëm propagandë e tritol

Komunistët janë të zhgënjyer në vitin e parë të qeverisjes së majtë.

Me anë të një deklarate për shtyp, Fronti i Majtë i drejtuar nga Marko Dajti, ka thënë se kjo qeveri ka arritur sukses vetëm në marketing.

Ai thotë se kjo qeveri është marrë vetëm me shkatërrime, dhe jo zgjidhje hallesh për popullin.

Fronti i Majtë ka parashtruar edhe një sërë kërkesash.

Nëse ato nuk plotësohen, komunistët thonë se do të nisin protestat.

“Fronti i Majtë i rikujton edhe një herë qeverisë shqiptare se, megjithëse po mbushet viti nga dita kur ka marrë në dorë celësat e pushtetit, nuk ka bërë akoma asgjë për të merituar pozicionimin e saj në spektrin e majtë.

Ende nuk janë përmbushur pikat thelbësore të programit të majtë dhe as ato detyrime që qeveria ka ndaj elektoratit dhe aleatëve të saj.

Qeveria arriti kulmin e suksesit vetëm në sektorin e marketingut dhe u bë e famshme për përzgjedhjen e kuadrit me një politike “meritokracie” të orientuar drejt kërkimit të femrave me zhvillim dhe hormone seksuale.

Ne i kërkojmë me forcë qeverisë “Rama” të kthejë vëmendjen nga nevojat e elektoratit që e ka votuar, të popullit shqiptar dhe atdheut.

Politika e tritolvënies e ka bërë të ngjajë më shumë me një qeveri barbarësh, sesa me një qeveri shqiptarësh.

Një qeveri që mendon të shkatërrojë pa marrë më parë masat për ndërtimin e një shteti social.

Është totalisht e gabuar dhe shprehje e një mentaliteti qeverisës që mendon për fasadën, por jo për themelet e ndërtesës-shtet.

Fronti i Majtë, si pjesë e koalicionit fitues në zgjedhjet e 23 qershorit, i bën të ditur Qeverisë “Rama” dhe mbarë opinionit publik se kërkon një angazhim më të madh për problemet thelbësore që shqetësojnë qytetarët e këtij vendi.

Ne nuk kemi marrë pjesë në këtë koalicon për ndarje postesh apo për zhvatje kolektive, por për të ngritur një shtet ligjor dhe në shërbim të qytetarëve.

Në këto kushte, Fronti i Majtë i drejtohet edhe një herë Qeverisë “Rama” me disa kërkesa, që janë njëkohësisht pjesë e programit të përbashkët politik të miratuar përpara zgjedhjeve të 23 qershorit. Ne kërkojmë:

– Arrestimin e menjëhershëm të të gjithë fajtorëve të tragjedisë së Gërdecit dhe drejtësi të plotë për këtë ngjarje. Dikur politikanët e majtë na nisnin në këmbë për të protestuar për këtë tragjedi, ndërsa sot po ata politikanë bëjnë marrëveshje të fshehta politike me kriminelët që shkaktuan 26 viktima. Por populli pret drejtësi.

– Arrestimin e menjëhershëm të të gjithë fajtorëve të tragjedisë së 21 janarit, ku katër burra mbetën të vrarë në bulevard, ndërsa protestonin për kauzën e majtë. Deri më sot, e vetmja gjë që ka bërë qeveria është vendosja përtokë e një pllakati që njerëzit e shkelin me këmbë, njësoj si pllakati që vendosi Sadami në fundin e luftës së Gjirit Persik me fytyrën e armikut të tij, Xhorxh Bush.

– Qeveria të miratojë kuadrin ligjor për ngritjen e Bankës Kombëtare Shtetërore të Kursimeve, një bankë që do të operojë në sistemin financiar si bankë e nivelit të dytë, me kapital tërësisht shtetëror. Qeveria duhet të kërkojë edhe licencimin dhe shtrirjen e kësaj banke në të gjitha ato shtete të cilat kanë filiale të bankave të tyre në Shqipëri, në mënyrë që shqiptarët të kenë mundësi t’i ruajnë kursimet e tyre në bankat e shtetit të tyre dhe të garantuara 100 % nga shteti. Të miratohet një ligj i posacëm për Bankën e Shqipërisë, e cila duhet të ketë kompetenca për politikat fiskale, por nuk mund të jetë një institucion që pavarësinë ta shndërrojë në abuzim.

– Të ndalohet menjëherë privatizimi i aseteve shtetërore në sektorët strategjikë dhe të anullohen të gjitha privatizimet e autorizuara nga satrapi Berisha në këta sektorë që ndikojnë drejtpërdrejt në sigurinë kombëtare.

– Të lirohen nga akuzat të gjithë ata persona që kanë ndërtuar pa leje në tokat apo trojet e tyre private dhe të lihen të lirë. Ne inkurajojmë dhe mbështesim qeverinë nëse vendos të prishë gjithë ndërtimet, me apo pa leje, të ngritura pas vitit 1990 në toka apo troje shtetërore ose publike. Në të gjitha këto raste, policia ka mbështetjen tonë të plotë edhe për të zhvilluar hetimet e rastit.

– Të përgatitet kuadri ligjor për legalizimin dhe licencimin e mbjelljes dhe kultivimit të kanabisit, sikurse ekziston në disa vende të Bashkimit Europian. Këto vende sot janë të detyruar ta blejnë kanabisin nga serat e Cekisë dhe Izraelit, ndërkohë që malet e Shqipërisë ofrojnë kushte ideale për një prodhim cilësor dhe fitimprurës për ekonominë vendase. Të lirohen menjëherë të persekutuarit e kanabisit, që nuk kanë bërë më shumë se sa kanë zbatuar parimin e idealeve tuiaja të Dhjetorit: “Ta bëjmë Shqipërinë si gjithë Europa”.

Në rast të mosplotësimit të këtyre kërkesave, Fronti i Majtë deklaron fillimin e një aksioni masiv protestash për kthimin e pushtetit te populli”, thuhet në deklaratën e komunistëve./b.l