Qetësohu ti Sokol…

Sokol Olldashi u mërzit shumë dje. Ai ishte gatitur që në mbledhjen e Grupit Parlamentar të PD-së, nëpërmjet antagonizmit, të ndryshonte skemën e emërimit të Edi Palokës si kryetar i grupit parlamentar. Por Sokoli nuk ia arriti dot. Edi Paloka u shpall zyrtarisht kreu i Grupit Parlamentar të PD-së.  Arena e debatit të zhvilluar dje me dyer të mbyllura në Grupin Parlamentar ishte thjesht kurorëzimi i një historie kulisash që zgjaste prej 1 jave.  Në epiqendër të tyre ishin personazhe si Lulzim Basha, Sokol Olldashi, Edi Paloka, Jamarbër Malltezi dhe anëtari i thjeshtë i Partisë Demokratike Sali Berisha.

Një ofertë “rioshe”

Gjithçka nisi kur ditën e martë më datë 3 Shtator, Lulzim Basha i çon fjalë Olldashit duke i thënë se i ofronte dy opsione për poste të larta në parti ose në Grupin Parlamentar, atij personalisht. Kjo ishte një ofertë serioze e bërë nga Basha. Me sa duket kreu riosh i Partisë Demokratike, po përpiqej të amortizonte revoltën e olldashianëve në PD pas zgjedhjeve të trukuara në parti që e bënë kryetar Bashën më 20 korrik. Një përpjekje për të krijuar ekuilibër force dhe normalitet në PD. Edhe Sokol Olldashi si të tillë e vlerësoi por nuk dha menjëherë përgjigje ndaj ofertës. Ai kërkoi kohë ta mendonte, u konsultua me të vetët por dilemën e kishte të fortë. Ndërsa Sokoli shqyrtonte ofertën, vetë oferta shkaktoi efektin e saj diku tjetër. Berisha thirri në takim kryetarin e tij, Lulzim Bashën, e i kërkoi sqarime në lidhje me këtë ofertë. Basha i dha arsyet e tij, që lidheshin kryesisht me arritjen e ekuilibrit të forcave në PD, por patriarku duket se ka një tjetër koncept, të ndryshëm nga kryetari i tij mbi ekuilibrin dhe forcën.

Anëtari bind Kryetarin
Pas takimit që kryetari Basha zhvilloi  me anëtarin e thjeshtë të partisë së tij, u bind se oferta që ai i kishte bërë Olldashit nuk ishte e duhura. Kështu që rreth ditës së enjte negociatat thuajse u pezulluan dhe kryetari Basha duke ndjekur këshillat e takimit nisi të vinte në zbatim një tjetër skemë. Me përparësi ishte zgjedhja e krerëve të grupit parlamentar, parlamenti do mblidhej shumë shpejt. Nga Berisha ishte sugjeruar me prioritet të lartë emri i Edi Palokës. Ky ishte një emër që Bashës nuk i vinte shumë për shtat, sidomos në kushtet kur po kalohej nga ekstremi në ekstrem, nga negociatat për ti dhënë olldashianëve prezencë dhe kontroll në Grupin Parlamentar – në emërimin e komanduar të një figure që njihet mirë veç të tjerave për egërsinë ndaj kampit Olldashian. Gjatë gjithë ditës së premte Basha u përpoq që nga patriarku Berisha, të merrte ndonjë kandidaturë alternative, që nuk quhej Edi Paloka të paktën. Por “anëtari i thjeshtë” nuk lëvizi nga istikami. Sinjalin se ishte mbaruar ajo punë me Edi Palokën u dha qartë ditën e shtunë kur Lulëzim Basha, Edi Paloka dhe Jamarbër Malltezi u shfaqën tok në Tiranë tek “përurimi i Bulevardit” tek Stacioni i Trenit, në mënyrë demonstrative. Kaq u desh që në kampin e Olldashit, por jo vetëm, të kërcisnin telefonatat. Edhe Genc Pollo ishte i shqetësuar. Po edhe Genc Ruli. Të gjithë bluanin të njëjtën pyetje mes tyre: Ore seriozisht e paskan këtë punën e Palokës këta?

Patriarku dhe Sokoli
Sokol Olldashi, duke i marrë këto të dhëna në rrugë informale, vendosi me shpejtësi të godiste procedurën e zgjedhjes së Palokës në mbledhjen e Grupit Parlamentar që u çel dje në orën 11:00. një burim i DITA na dha detaje mbi atë që ndodhi brenda. Pas modaliteteve, fjalën e mori kryetari Lulëzim Basha. Ai nisi të ravijëzonte emrin e Edi Palokës për kryetar të Grupit, Eduart Halimin si nën/kryetar dhe Jorida Tabakun si zëdhënëse të grupit të PD-së në Kuvend.

Kaq u desh dhe Sokol Olldashi çohet rrëmbimthi dhe ndërpret Bashën: “Kush i paska vendosur këto punë?”, “Si mund ta mësojmë nga gazetat ne deputetët se kë do kemi udhëheqësi të grupit?”.  Por edhe duke kaluar në dëftore me fjali të tipit: “Ky është një vendim që godet rregullat e partisë tonë” apo akoma më tej “Unë do reagoj publikisht për këtë që keni bërë ju sot”.

Sikletin më të madh në rrethanën e krijuar e ka patur me siguri Lulëzim Basha. I duhej të mbronte emërimin e Edi Palokës, që vetë as e kishte imagjinuar dhe as e dëshironte deri disa ditë më parë, por për të nuk kishte më kthim mbrapa. “Nuk është plotësisht kështu”, “Është zgjedhje e rregullt kjo zoti Olldashi”, ishin disa nga fjalitë që Basha përsëriste, por në sallën e mbledhjes timbri i zërit të Olldashit e mbyste atë të kryetarit dhe ky i fundit shpesh nuk e çonte dot deri në fund fjalinë.

Duket se mërmëritjet  të kombinuara me ofensivën e Olldashit, bënë që Berisha të ndërhynte: “Qetësohu ti Sokol”, – e nisi ai ndërhyrjen. Sokoli heshti. Më pas Berisha ka vijuar:  “Zgjedhja e Edi Palokës e të tjerëve është e përkohshme zotëri. Partia Demokratike pati një risi në korrik pasi për herë të parë zgjodhi kryetarin e saj me parimin ‘një anëtar një votë’. Deri në Dhjetor ne do i kemi zgjedhur dhe të gjitha strukturat me këtë parim, të jesh i sigurt ti,  por deri në Dhjetor ne s’mund ta lëmë grupin tonë parlamentar pa kryetar dhe lidership. Do ishte anormale. Asnjë shkelje nuk ka pasi është provizore”.

Kaq u desh, debati mori fund, emërimet u firmosën, Edi Paloka është zyrtarisht Kreu i Grupit Parlamentar të Demokratëve, ndërsa Olldashi nuk e pa të nevojshme të dilte vërtetë me një reagim publik siç edhe iu kërcënua kryetarit Basha.