Vdes në aksident gazetarja e News 24, Dade: Pengu i një interviste të parealizuar

Humb jetën në një aksident rrugor teksa ndodhej në krye të detyrës, gazetarja e News 24, GSH dhe BalkanWeb, Enkelejda Skënderasi, 29 vjeçe. Ngjarja ndodhi në orën 12:45 të ditës së djeshme pranë fshatit Panarit teksa Enkelejda kthehej nga një aktivitet për  “100 vjetorin e masakres së Panaritit” së bashku me kolegë të tjerë. Fatkeqësisht misioni i saj është ndërprerë, teksa makina me të cilën gazetarja 29-vjeçare dhe tre kameramanë të televizionit ktheheshin nga fshati i Panaritit, ka dalë nga rruga. Për pasojë ka gjetur vdekjen Enkelejda ndërsa tre kameramanët dhe shoferi morën dëmtime të lehta.

Dëshmia

Aksidenti ndodhi mesditën e djeshme në degëzimin e fshatit Panarit-Vithkuq, Korçë, ku gjatë humbjes së kontrollit të automjetit të drejtuar nga Daniel Hyka, punonjës i Dejtorisë Pyjore në Korçë, fuoristrada me targa angleze K 679 EJM ka dalë nga rruga dhe ka rënë 20 metra në greminë. Enkelejda ka marrë plagë në kokë të cilat i shkaktuan vdekjen rrugës për në spital.  Operatori Reshit Dikolli i cili ndodhej në automjetin e aksidentuar  u shpreh se gazetarja Enkelejda Skënderi ishte ulur në vendin e parë të automjetit dhe e kishte vendosur rripin e sigurimit. “Shoferi kishte ndaluar sepse kishte dalë një makine tjetër përpara. Nuk ka qenë asnjë manovër e gabuar e shoferit. Ishim në malore dhe shoferi ndaloi. Enkelejda ishte ulur në vendin e parë, unë isha ulur mbrapa dhe kishte vendosur rripin e sigurimit por në momentin që makina u nis rrëshkiti nga zhavorri. Ne ramë poshtë dhe Enkelejda doli nga makina dhe u përplas në një shkëmb, ne e gjetëm jashtë të mbuluar në gjak” tha Dikolli.

Enkelejda Skënderasi ka lindur ne qytetin e Korçës më 1 tetor të vitit 1985. Pas përfundimit të studimeve në degën Filozofi-Sociologji në Universitetin “Fan Noli” ka nisur të ushtrojë profesionin e gazetares. Do të ketë homazhe sot në orën 12:00 në Teatrin “A. Zako Çajupi”.

Arta Dade: Më ngeli peng një intervistë që nuk e bëra dot me Enkelejdën

Deputetja socialiste Arta Dade, e cila e njihte prej vitesh Enkelejden tregon takimin dhe bisedën e fundit me të si dhe një fotografi së bashku gjysmë ore para aksidentit tragjik

“Jam tepër e tronditur… Ishte një gazetare me shumë pasion, e papërtuar asnjëherë, e palodhur. E kam të pamundur të gjej fjalët ngushëlluese për familjen dhe të afërmit e saj. Isha tek nëna e saj sot dhe tronditja që vazhdoj të ndiej për humbjen e jetës së Enkelejdës është e papërshkrueshme. Ishte shembulli i vajzës së re me shumë pasion. Kur u pamë me një grup vajzash sot në Panarit me rastin e përkujtimit të masakrës që ka ndodhur aty nga andartët grekë, u përqafuam sikur të kishim kohë pa u parë. Në fakt ishim takuar vetëm një javë më parë në përvjetorin e masakrës së Borovës. Më vjen shumë keq…  Jam shumë e tronditur. Më ka ngelur një peng i madh një intervistë që Enkelejda më kërkoi t’i jepja dhe që unë e premtova për pas aktivitetit. I thashë do flasim në Vithkuq ku ishte shtruar edhe dreka. Por ajo intervistë nuk mundi të realizohej. Jam shumë e prekur që Enkelejda në mënyrë të rrufeshme postoi në Facebook dhe në faqen online të Gazetës Shqiptare fotografinë që bëmë së bashku në Panarit, vetëm gjysmë ore para aksidentit. Kjo fotografi do të mbetet një kujtim shumë i çmuar për mua. Dhe unë do ta mbaj gjithnjë në mendje Enkelejdën të pastër, të çiltër, të dashur shumë dinjitoze, shumë të mençur, mjaft e artikuluar, cilësi këto të vyera për një gazetare…”