“Covid po na ndan, do bëhet shumë e vështirë ta mbajmë BE-në”

“Mosmarrëveshjet e vendeve anëtare për politikat ekonomike gjatë pandemisë së koronavirusit, rrezikojnë që ta ndajnë projektin evropian”.

Këtë paralajmëron komisioneri për ekonominë në BE Paolo Gentiloni i cili flet për dallime ekonomike në rritje mes vendeve, në vend që të zvogëlohen përballë një pandemie të tillë.

 “Është e qartë se dallimet ekonomike midis vendeve evropiane, në vend që të zvogëlohen përballë një krize si kjo, ato po rriten. Do të jetë shumë e vështirë ta mbajmë bashkë projektin evropian”, thotë Gentiloni, transmeton Radio Evropa e Lirë.

Të enjten, Gjermania dhe shtetet e tjera veriore të BE-së e refuzuan një propozim të mbështetur nga nëntë vende, përfshirë Italinë, Spanjën dhe Francën, për të ashtuquajturat “bono-detyrime për koronën”.

Ato do të lëshoheshin në emër të Eurozonës si tërësi dhe do të ishin borxh i përbashkët i shteteve anëtare. Vendet anëtare evropiane duhet të “fillojnë me objektiva të përbashkëta”, tha Gentiloni.

“Kemi nevojë për një instrument të ri të garantimit të papunësisë dhe një plan për mbështetjen e biznesit”, tha mes tjerash ai.

Dy vendet me numrin më të madh të viktimave nga koronavirusi janë Italia dhe Spanja, të dyja anëtare të BE-së.

Aktualisht, numrin më të madh të të infektuarve e kanë Shtetet e Bashkuara, me mbi 145,000 raste.

l.h/ dita