Kozara Kati: Hapja e dosjeve është e domosdoshme

Aktivistja e shoqërisë civile, Kozara Kati, mbështet çdo lloj transparence që i bëhet sistemit të kaluar komunist, por pa shkaktuar plagë të reja dhe hakmarrje.

“Shoqëria shqiptare ka dëshmuar një tolerancë edhe ndaj së keqes, edhe ndaj asaj që i ka shkatërruar jetën. Është e domosdoshme transparenca që i shërben një katarsisi moral të viktimave të torturës nga sistemi i kaluar, por, i tregon dhe vendit dhunuesit dhe mekanizmat që ka përdorur. Jam dakord për çdo transparencë të sistemit përsa kohë kjo transparencë është e vërtetë, me qëllim të mirë dhe nuk shkatërron vuajtje dhe plagë të reja“, theksoi Kati.

Ajo u shpreh se hapja e dosjeve është një proces i vonuar.

“Është shumë e vonuar, gjithmonë në funksion të një transparence të një periudhe të diktaturës në Shqipëri. Gjatë gjithë periudhës së demokracisë kanë qarkulluar shumë variante të zhdukjes, ndryshimit të dosjeve. Nuk ka asnjë lloj garancie që dosjet të jenë të plota dhe të besueshme. Për mendimin tim, duhet të fillohet nga ata persona që janë në pushtet dhe kanë në dorë jetën e të gjithë shqiptarëve“, deklaroi Kati.

Sipas shoqërisë civile, hapja e dosjeve duhet parë si një proces purifikimi i shoqërisë dhe individi në këtë rast duhet të vihet në funksion të kësaj kërkese të lartë.