KQZ me 4 anëtarë, Gjonçaj: Shkarkimi i Muhos, si gjyqet e diktaturës

Komisioni Qendror i Zgjedhjeve ka nisur sot mbledhjen, pavarësisht largimit të anëtarëve të së majtës. Me katër anëtarë, KQZ ka nisur mbledhjen e radhës, ku përfaqësuesi ligjor i PS-së, Genc Gjonçaj, është shprehur se dorëheqjet e anëtarëve të së majtës ishin veprime civile.

“Në anën e majtë tuajën zonja kryetare është ulur zoti Zguri, që do kisha dëshirë ta uroja për detyrën e re, pasi mendoj që çdokush që ulet aty përgëzohet për misionin, por më lejoni të them që e kam të pamundur, pasi pak ditë më parë një koleg u shkarkua pa të drejtë nëpërmjet procedurave dhe vendimmarrjes që më ngjasonte me gjyqet publike të kohës së diktaturës. Ajo vendimmarrje nuk cenoi vetë anëtarin, por preku legjitimitetin e KQZ-së dhe të këtij procesi. Tashmë një gjë të tillë e thonë të gjithë partnerët ndërkombëtarë që kujdesen që Shqipëria të largohet nga mentalitetet e komunizmit dhe të marrë rrugën drejt demokracisë europiane. Tre karrige bosh, flasin shumë, tregojnë që institucionet janë të kapura nga politika. Sot KQZ është kthyer në një organ politik. Veprimi i fundit i Kuvendit më ngjan me zgjedhjet e vitit 2011 ku në përfundim të zgjedhjeve, KQZ-ja e asaj kohe ndryshoi rregullat e lojës kur gara kishte përfunduar, ndërsa sot u ndryshua arbitri i kësaj loje, kjo ndodh sa herë ndjeni frikën e mazhorancës”, tha ai.