Kreditimi i biznesit ndoqi një ritëm të dobët edhe gjatë muajit Tetor. Sipas Bankës së Shqipërisë, kredia e re për biznesin preku vlerën e 12.8 miliardë lekëve, me rritje të lehtë krahasuar me Shtatorin, por në rënie të thellë me 42% krahasuar me të njëjtën periudhë të një viti më parë. Shifrat progresive bëhen kështu më negative dhe për 10-mujorin kredia e re për biznesin ka rënë me afro 21%. Kreditimi është në rënie për të gjithë sektorët e ekonomisë, duke filluar nga tregtia, që zë edhe peshë kryesore në kredinë bankare. Kredia e re për tregtinë ra me 17% kundrejt të njëjtës periudhë të një viti më parë. Dobësimi i kërkesës konsumatore dhe rënia e volumeve të shitjeve po reflektohet edhe në ritmet e ndërmjetësimit financiar të sektorit të tregtisë. Tkurrja e kreditimit ka prekur edhe sektorët prodhues të ekonomisë. Segmenti më i rëndësishëm, industria përpunuese, ka pësuar rënie të kredisë së re me 16%, ndërsa industria nxjerëëse ka rënë me 25% dhe bujqësia me 7%. As politika monetare lehtësuese dhe as masat e tjera për nxitjen e kreditimit nuk po japin ndonjë efekt të dukshëm. Banka e Shqipërisë vë në dukje se problem kryesor është kërkesa e dobët e bizneseve për kredi. Vrojtimet e besimit të biznesit kanë treguar se, në të gjithë sektorët ekonomikë, më pak se 20% e ndërmarrjeve kanë kryer investime të reja. Oferta për kredi vijon gjithashtu të jetë e shtrënguar. Për shkak të nivelit të lartë të kreidve me probleme dhe ekonomisë së përkeqësuar, bankat kërkojnë më shumë siguri në huadhënie.