Si reagoi qeveria e Rumanisë për vrasjen e një vajze 15 vjeçare

Disa ditë më parë një ngjarje e shëmtuar ka tronditur Rumaninë.

15-vjeçarja Aleksandra Macesanu u zhduk në perëndim të Bukureshtit ndërsa po bënte autostop për të shkuar në shtëpinë e saj në qytetin Karakal. Fatkeqësisht, vajza u gjet, më vonë, e vdekur.

Ndërsa opinioni publik në vend ishte i shqetësuar për fatin e vajzës, para se trupi i saj të gjendej, ministria e Arsimit e Rumanisë, Ekaterina Andronescu, u shpreh në një televizion “se fëmijëve u mësohet që të mos hipin në makinë me të huaj”.

Këto komente kanë ngjallur reagime të shumta. Kryeministrja rumune Viorika Dancila e shkarkoi menjëherë ministren duke i konsideruar komentet e saj si të papërgjegjshme, edhe pse sqaroi se ish-ministrja nuk kishte dashur të fajësonte prindërit e viktimës.

Në fakt situata duket se nuk është menaxhuar mirë edhe nga policia. 15-vjeçarja, ndërsa po mbahej nga rrëmbyesit, kishte arritur të telefononte tre herë shërbimin e emergjencës, por policia kishte vonuar 19 orë për të filluar kërkimet në pronën ku ajo po mbahej. Për adresimin e dobët të situatës u pushua nga puna shefi i policisë së vendit, si dhe u dorëhoq edhe ministri i brendshëm.

Mediat rumune bëjnë me dije se për vrasjen e Macesanut u ndalua një 65-vjeçar, i cili ka pranuar fajin. Ai gjithashtu ka pohuar se ka vrarë edhe një adoleshente tjetër, që është zhdukur në muajin prill.

e.ll./dita