Si e raportuan disa nga mediat kryesore ndërkombëtare refuzimin e BE për Shqipërinë dhe MV

Refuzimi i hapjes së negociatave me Shqipërinë dhe Maqedoninë e Veriut ka tërhequr sot vëmendjen e medias kryesore ndërkombëtare.

Gazeta prestigjioze amerikane ”The Washington Post” tërheq vëmendjen e lexuesit me titullin ”BE dështon të hapë bisedimet e anëtarësimit për vendet e Ballkanit.”

“Udhëheqësit e Bashkimit Evropian dështuan të binin dakord për hapjen e negociatave të anëtarësimit me Shqipërinë dhe Maqedoninë e Veriut, në një tërheqje të sikletshme që mund të irritojë rajonin e paqëndrueshëm të Ballkanit”, sipas kësaj të përditshmeje.

Ndërkohë, transmetuesi britanik BBC shkruan se ”BE bllokon përpjekjet e anëtarësimit të Shqipërisë dhe Maqedonisë së Veriut”.

”Zyrtarë të lartë të BE-së kanë reaguar me zemërim pasi një pjesë e vogël e vendeve anëtare, të udhëhequra nga Franca, bllokuan fillimin e bisedimeve të anëtarësimit me Shqipërinë dhe Maqedoninë e Veriut”, sipas transmetuesit BBC.

”Diplomatët theksuan se udhëheqësit e 28 shteteve të bllokut kaluan orë të tëra në debat të nxehtë mbi këtë çështje, por nuk arritën të bien dakord”, thekson ajo.

”Franca kritikohet për bllokimin e bisedimeve të pranimit mes Ballkanit dhe BE-së”, shkruan ndërkohë ”Financial Times”.

“Franca u përball me kritika pas bllokimit të fillimit të bisedimeve zyrtare të BE me Maqedoninë e Veriut dhe Shqipërinë për t’ju bashkuar bllokut, duke thelluar kështu një mosmarrëveshje mbi zgjerimin e BE-së”, sipas kësaj gazete.

j.l./ dita