I nxehti, Veliaj: Aksion për ndërprerjen e lidhjeve të paligjshme, kurseni ujin

Temperaturat e larta dhe thatësia që ka përfshirë gjithë Europën, ka detyruar Bashkinë e Tiranës që të mbledhë grupin e Taks Forcës për të diskutuar për planin e masave për përballimin e kësaj situate emergjence në kryeqytet.

Ashtu si edhe në shumë qytete të tjera, të Italisë si Parma e Perugia, Kryetari i Bashkisë së Tiranës Erion Veliaj shpalli gjendjen e emergjencës në kryeqytet deri në kapërcimin e situatës.

“Lavazhet dhe pishinat mund edhe të mbyllen përkohësisht nëse do të jetë e nevojshme”, tha Veliaj.

“Monitorim i aktivitetit  të lavazheve dhe pishinave dhe mbylljen e përkohshme nëse do të jetë e nevojshme. Kush lanë makinën e vet me ujë të pijshëm do të përfundojë në komisariat”, tha kreu i bashkisë Erion Veliaj.

Ai bëri të ditur se  sapo ka mbaruar një by pass që furnizon dhe zonën e Unazës së Re nga burimet e Bovillës për të evituar mungesën e ujit nga tharja e puseve në Laknas dhe Bërxullë.

“Duke qenë se dhe Bovilla ka rënë, edhe sasia e ujit që vjen nga Bovilla është gjithashtu modeste, për të mos thënë minimale. Më rezulton që dhe ndërhyrja që kemi pasur sot me policinë e shtetit tashmë i ka dhënë rezultatet e para dhe në depot e Kasharit kemi një rritje të nivelit vetëm falë 150 ndërhyrjeve që kemi bërë sot në mëngjes”, tha Veliaj më tej.

Kryetari i Bashkisë sqaroi se investimet e bashkisë në punë publike si shatërvanët e sheshit “Skënderbej”,  janë konceptuar për të minimizuar konsumin e ujit.

Veliaj tha se ky sistem nuk ka asnjë lidhje me sistemin e furnizimit me ujë të qytetit të Tiranës.