Dy javë pas vizitës së paparalajmëruar në Shkup, Komisioneri për Zgjerimin në Bashkimin Europian, Stefan Fyle, do të vizitojë sërish Maqedoninë.
Sipas agjencisë së lajmeve INA, zyrtari i lartë i BE-së do të mbërrijë në Shkup në 19 shkurt, ku do të përpiqet sërish për uljen e tensioneve midis partive më të mëdha maqedonase të pushtetit dhe të opozitës.
Gjatë vizitës në Maqedoni, ai do të shoqërohet nga drejtori i Drejtorisë të Përgjithshme për Zgjerimin e BE-së, Stefano Sanino.
Në takimet me kreun e shtetit pritet të shqyrtohen edhe njëherë përgatitjet për Raportin e pranverës të Komisionit Evropian për Maqedoninë.
Përpos Fyles, në periudhën e ardhshme Maqedoninë pritet ta vizitojë edhe raportuesi për Republikën e Maqedonisë në Parlamentin Evropian, Riçard Hovit.
Javën e ardhshme Hovit, në takimet me përfaqësues të opozitës dhe mazhorancës, do t’i këshillojë ata që të përqendrohen në procesin e integrimit evropian, duke lënë anash interesat e brendshme politike dhe partiake. / INA