Kryebashkiaku i Selanikut: Vorioepiri nuk ekziston

Kryebashkiaku i Selanikut thotë se termi Vorioepir nuk ekziston dhe zyrtarët dhe mediat greke duhet të përdorin emërtimin zyrtar “Shqipëria”.

Në një intervistë për televizionin kombëtar grek NET, kryebashkiaku Jani Butari thotë se termi Vorioepir “është vetëm një koncept që kënaq ndjenjat tona”. “Kur flitet për problemet e minoritetit grek, në Shqipëri duhet të mos përdoret më termi “Vorioepir”, pasi është zyrtarisht një çështje që i përket vetëm Shqipërisë”, tha Butari.  “Mendoni se çfarë do të ndodhte sikur ta quaja Shkupin me termin “Maqedoni”. Do të më varnin me kokë poshtë apo jo?”, pyet Butari gazetarin.
Ndërkaq, ai ka deklaruar se do të kthejë në shtëpi muze shtëpinë e Qemal Ataturkut, që sipas tij, është një nga figurat më të mëdha që kanë jetuar në Selanik. “Pavarësisht nga dimensioni politik, ai ka qenë një udhëheqës i madh, një nga liderët më të mëdhenj të shtetit turk. Mos harroni se Selaniku është një qytet ku u themelua Republika Turke”, sqaron Butari.

Qytetari i parë i Selanikut thotë se drejton një qytet shumetnik. “Selaniku ishte një qytet shumetnik. Përpara pavarësimit, qyteti kishte 12 gazeta ku kishte turke, hebreje, greke, franceze, italiane dhe gjermane, këto gazeta dikush i lexonte asokohe. Kjo tregon se kishte një prezencë të fortë shumetnike në qytet. Unë nuk them të kthehemi në të kaluarën, por të ketë një traditë të njohjes dhe ruajtjes së këtyre vlerave”, tha Butari.