Kryebashkiaku Mziu tenton shpëtimin me procedurë

Shtyhet seanca gjyqësore ndaj kryebashkiakut të Kamzës, Xhelal Mziu. E caktuar për t’u zhvilluar mesditën e sotme, shkak për këtë shtyrje është bërë një kërkesë e befasishme e palës mbrojtëse dhe vetë të zgjedhurit vendor të akuzuar për shpërdorim detyre për pabarazi në tendera dhe taksa të paligjshme ndaj bizneseve.

Kur procesi po shkon drejt fundit dhe prokuroria po bëhet gati të japë pretencën e saj, kryebashkiaku ka zgjedhur një strategji të re mbrojtjeje, që i sjell atij mundësinë për të shtyrë gjyqin dhe për të shfrytëzuar hapësirat ligjore nëpërmjet ndërrimit të trupit gjykues.

Kërkesa e kryebashkiakut se kërkonte ndryshimin e trupit gjykues me kryesues gjyqtarin Besnik Hoxha, sipas procedurave juridike ka sjellë edhe shtyrjen e seancës. Pala mbrojtëse pretendon se gjatë procesit që ka nisur në shkurt të këtij viti, trupi gjykues nuk i ka pranuar një prej provave që ka paraqitur i pandehuri Mziu. Me këtë pretendim, kryebashkiaku jo vetëm fiton kohë, por edhe mundësi që një tjetër gjyqtar nga shorti të jetë edhe më favorizues.

Por sipas kuadrit ligjor, një i pandehur ka të drejtë të paraqesë çdo lloj kërkese gjatë procesit dhe njëkohësisht të kërkojë ndryshimin e trupit gjykues. Sipas procedurave, kjo kërkesë e bërë ditën e djeshme, do të hidhet në short në Gjykatën e Tiranës dhe do caktohet gjyqtari që do e marrë për vlerësim.

Pritet që Mziu pas shortit të paraqesë edhe pretendimet dhe më tej të jepet vendimi nëse ka apo jo të drejtë dhe nëse trupi gjykues do të ndryshohet. Nëse kërkesa pranohet, atëherë do të hidhet një short i dytë dhe nëse jo, prokuroria ka rrugën e hapur që së shpejti të paraqesë pretencën e saj.

Sipas Kodit Penal, Mziu rrezikon deri në 7 vite burgim, ndërsa nuk i ka pranuar asnjëherë akuzat gjatë seancave gjyqësore dhe ka akuzuar për një gjyq politik ndaj tij. Kryebashkiaku i Kamzës u arrestua një vit më parë me vendim gjykate nga prokuroria, pas një hetimi tre mujor për tenderin e anuluar dhe heqjen me pa të drejtë të investimit të rrugës Valias-Laknas i ri, nga firma fituese tek një e dytë, me vlerë 81 milionë lekë.

Si të pandehur në këtë dosje janë dhe Atlis Hoti, juristi i Bashkisë Kamëz dhe Bujar Loshi, drejtori i Zyrës së Tatimeve. Këta persona  akuzohen për abuzime lidhur me një tender të Bashkisë së Kamzës, për ndërtimin e një rruge, taksat dhe tatimet e paligjshme të vendosura ndaj dy kompanive “Albavia” dhe “Gjoka”, të cilat kanë kryer 4 kallëzime penale në ngarkim të funksionarëve të lartë. Mbetet për t’u parë nëse Drejtësia do të bëjë drejtësi në dosjen “Mziu” dhe nëse kryebashkiaku do të shpëtojë nëpërmjet procedurave.