Kryemadhi: Dosjet “184” dhe “339” do shoqërohen nga dosja e 30 qershorit

Kryetarja e LSI-së, Monika Kryemadhi ka mbledhur mbrëmjen e kësaj së premte strukturat e Lëvizjes Socialiste për Integrim. Gjatë fjalës së saj, zonja Kryemadhi ka thënë se më 30 qershor mori fund vizioni i kryeministrit Rama për ta kthyer Shqipërinë në një vend monist.

Ajo, gjithashtu, ka paralajmëruar një tjetër dosje të bujshme hetimore, përveç “184” dhe “339” të cilat, kujtojmë se, janë mbi blerjen e votave në zgjedhjet e vitit 2017. Kryemadhi u shpreh se do të ketë edhe një dosje për30 qershorin me fjalët: “30 qershori ishte fundi i të gjithë psikologjisë dhe vizionit të tij (Ramës) për ta kthyer Shqipërinë në një vend monist. Sot kemi një raport të ODIHR, që thotë se në zgjedhje një parti u regjistrua në mënyrë të jashtëligjshme. Dosja “184” dhe “339” do kenë bashkëudhëtare edhe dosjen ‘30 qershori’. Se Rama nuk ndejti dot pa futur dorën tek kutia, procesverbali, gjithë procesi zgjedhor”.

Në lidhje me zgjedhjet lokale, Kryemadhi iu referua edhe ambasadorëve të akredituar në Tiranë. Sipas saj, ata nuk kanë folur fare për procesin zgjedhor të 30 qershorit, por janë të fokusuar te dialogu.

Kryemdhi tha: “Mund ta largojmë këtë njëri të çmendur vetëm me rezistencë.  Çdo hap i opozitës ka qenë i mirëmenduar. Keni dëgjuar ju ndonjë  ambasador të flas për zgjedhjet. Pse nuk flasim për zgjedhjet, por flasin vetëm për dialog”.

Në vijim, Kryemadhi tha se kryeministri Edi Rama është shndërruar në një personazh qesharak, teksa tha se lajmërimi për ndërprerjen e projektit të rrugës Thumanë- Kashar nuk është i vërtetë, por shtoi se ky projekt po kryhet me një “devotshmëri të paparë”.

Ajo u shpreh: “Ne qeshim dhe ne bëjmë shaka  me të, sepse e ka ulur veten. Ky është personazh, i cili çdo ditë e më shumë  po bëhet qesharak. Ekonomia po fillon të rrënohet.  Projekti i rrugës Thumanë-Kashar nuk është anuluar, por po vazhdon me një devotshmëri të paparë. Arroganca që ka kjo qeveri po kalon çdo pritshmëri”.