Kryemadhi merr drejtimin e LSI-së

Lëvizja Socialiste për Integrim ka zyrtarisht kryetarin e ri të saj.

Votimi i saj u bë me kartona të hapur nga delegatët në Konventën Kombëtare Zgjedhore që u mbaj në pallatin e sportit “Asllan Rusi”.

Kryemadhi: “Sot ju më dhatë votën për t’iu drejtuar në opozitë, kjo është një detyrë pa kushte për mua.Ju jap fjalën e nderit, jo të një gruaje, as të një burri, por ju jap fjalën e nderit të një nëne që nuk do ndalem as një minutë, as një sekondë jo vetëm për të denoncuar por për të luftuar deri në fund që ky vend të mos jetë vatra e krimit, drogës dhe oligarkëve, qoftë kjo edhe me çmimin e jetës sime”.

Konventa do të zgjedhë edhe nënkryetarin e ri, post i cili mbetet bosh me emërimin e zonjës Kryemadhi kryetare.

Petrit Vasili u zgjodh të drejtojë LSI-në më 3 maj të këtij viti, por dha dorëheqjen, pasi siç theksoi ai, partisë i duhet ristrukturim dhe energji të reja me marrjen e rolit të opozitës pas 25 qershorit.

Pas marrjes së drejtimit të LSI, Monika Kryemadhi në llogarinë saj në “Facebook” e ka falenderuar Vasilin, duke e cilësuar si bashkëluftëtar në rrugëtimin e partisë.

Drejtuesja e re e LSI u shpreh se partia e saj do të bëjë opozitë të pa kompromisë me mafian.

“Jam ende e emocionuar nga konventa e sotme e LSI, nga mbështetja dhe energjia që më dhatë të gjithë ju në sallë dhe qindra e mijëra të tjerë që na ndoqët nga ekrani apo rrjetet sociale.

Unë do të doja t’ju shtrëngoja duart të gjjthëve, t’ju shprehja edhe njëherë mirënjohjen për besimin dhe energjinë që na jepni çdo ditë. Por në veçanti dua të falenderoj mikun dhe bashkëluftëtarin tim të hershëm dhe shumë të dashur, Petrit Vasilin, këshillat dhe mbështetja e të cilit kanë qenë dhe do të mbeten shumë të rëndësishme për mua si politikane dhe si drejtuese e LSI.

Ndihem krenare që do të jemi në krah të njëri-tjetrit në betejën tonë të madhe opozitare. LSI do të jetë opozita pa kompromis, kundër tiranisë së një qeverie të inkriminuar, të korruptuar dhe të marrë peng nga oligarkët. Të gjithë së bashku do të jemi zëri dhe forca kundër mafias në pushtet.”- shprehet Kryemadhi.