Kryemadhi: Rama rrethoi “diskotekën”, nesër do t’i japim një mësim të mirë

Për kryetaren e LSI-së, Monika Kryemadhi të gjithë nesër duhet të dalin në protestë si qytetarë për të rrëzuar këtë qeveri. Ajo tha se pushteti po përpiqet që të bllokojë rrugët dhe kryeministrin Rama e ka zënë frika, por sipas saj protesta do të jetë qytetare dhe paqësore.

“E keni parë Ramën si e ka rrethuar atë ndriçimin e vet që e ka si diskotekë. Sikur të kujdesej për shqiptarët sikur kujdeset për neonin te Kryeministria. Ai njeri ka ikur, iku që dje. Shqipëria është shtëpia e shqiptarëve, ndoshta për atë është kolibja e qenve. Protesta nesër është për t’i dhënë një mësim të mirë politikës dhe politikanëve. Hapja e negociatave ka rëndësinë më të madhe sepse Shqipëria ndahet përfundimisht nga e kaluara dhe do të ndajë politikën nga krimi që ka uzurpuar qeverinë dhe parlamentin. Frika i ka bërë që të bllokojnë rrugën dhe autobusët dhe të kërcënojnë shoferët. Por nuk kanë bërë llogaritë që e gjithë Tirana do të jetë nesër në shesh, nuk ka nevojë për autobusë dhe makina. Nesër unë dal si qytetare, si nënë, si bashkëshorte. Protesta do të jetë paqësore dhe qytetare“, tha Kryemadhi.

Për protestën e së shtunës policia ka frikë për një skenar dhune. Hyrja kryesore e Kryeministrisë  u mbulua me rrjeten mbrojtëse. Sipas deklaratës zyrtare të Policisë, theksohet se janë administruar informacione se persona të caktuar, me rekorde kriminale apo të dënuar më parë për vepra të rënda penale, janë përgatitur për të ushtruar dhunë.

v.l/ Dita