Kryetari sefte i PD-së, Lulzim Basha, hap zyrën e tij në…Facebook!

Lulzim Basha, i veshur me kostumin e liderit të Partisë Demokratike, reagon për të dytën herë nëpërmjet Facebookut. Nuk ka bërë asnjë dalje publike si kryetar sefte i selisë  blu, pasi ende nuk i ka marrë çelësat nga ish-kryetari i dorëhequr. Kështu pra, Kryetari i Partisë Demokratike, njëherësh kryebashkiaku i Tiranës, Lulzim Basha ka reaguar dje në lidhje me konferencën që pritet të organizojnë sot Partia Socialiste, “Shqipëria e Gjeneratës Tjetër”. Kjo konferencë që sipas kryeministrit të zgjedhur Edi Rama do fokusohet tek një kapitull i ri për territorin dhe ekonominë, për Bashën nuk është gjë tjetër, veçse ndarje e tortës në mënyrë okulte, sidomos e pjesëve të çmuara të vendit siç është bregdeti, shprehet Basha. “Kryesocialisti ka thirrur disa arkitekte të huaj me të cilët ka punuar e qarkulluar konkurse në Bashki dhe ka përjashtuar në bllok të gjithë ekspertët e mirëfilltë shqiptarë. Dhe ka dy ditë që punohet me dyer të mbyllura për çfarë mendon të bëjë në pjesët më të çmuara të vendit. Sidomos bregdetit. Po ndahet torta në mënyrë okulte. Pushteti lokal është jashtë loje. Në rend të ditës grabitja e pronave të bregut dhe stimulimi i bizneseve të fshehta që financuan në fushatë”, shprehet Basha. Sipas Bashës, konferenca e sotme është thjesht një fasadë, pasi sipas tij, pazaret tashmë janë bërë.

Reagimi i Ramës

Por pak minuta pasi kryebashkiaku Basha postoi mesazhin e tij për konferencën e Partisë Socialiste e cila nis sot, një tjetër postim ka ardhur nga kryesocialisti Rama. Në profilin e tij në Facebook, por edhe në Tuitter menjëherë janë postuar prej tij dy iniciale H dhe V, e cila në zhargonin e thjeshtë nënkupton hajvan, por nuk dimë nëse kryetari ka nënkuptuar atë fjalë. Në reagimet e ndjekësve të profilit të tij, kuptohej se bëhej fjalë për një mesazh të shkruar gabimisht, por ende nuk dihet për çfarë e kishte fjalën kryesocialisti Rama.

KOMENT/ Basha, manekini i drunjtë i PD-së

Nga Xhevdet Shehu

Më në fund Basha e shkrepi! Fiks një muaj pas fitores spektakolare në krye të PD-së me manipulim të listave të anëtarësisë, Basha u shfaq dje në Facebook. Kjo ishte vërtet një ngjarje që nuk mund të anashkalohej. Foli, pasi njerëzit ishin bërë merak se ku kishte humbur Basha dhe pse në vend të tij vazhdonte të fliste ish kryetari, pra dora vetë Sali Berisha. Ku bëhet Kryetari, pyesnin me shqetësim njerëzit që janë të interesuar për shefin e opozitës që të gëzojë shëndet të plotë dhe t’ia bëjë fora. Dhe më në fund, pas një muaji Ramazani, Basha e çeli me një mesazh që fliste shumë kundër PS-së. Në fakt, si pamësuar me këto punë, mesazhi i parë dukej si i shkruar nga Berisha. Ishte i njëjti stil, e njëjta mendësi, e njëjta gjuhë. Mund të mos e ketë shkruar Berisha me dorën e tij, por e ka diktuar, mbase me telefon. Truri i etur i Bashës ka regjistruar me kujdes çdo nuancë të mesazhit që duhej ta përcillte me postën e tij elektronike. Basha vërtetoi se është thjesht një manekin, por që ditën që u zgjodh në krye të selisë blu Berisha kishte harruar ta kurdiste. Mesa duket, dje Berisha është kujtuar se e kishte lënë krejt pas dore, ndaj e kurdisi dhe Basha foli. Por si foli?  Në atë mesazh Basha paraqitet gjakftohtë si atëherë kur ishte ministër i Brendshëm dhe në bulevardin qendror të Tiranës u vranë 4 qytetarë të pafajshëm. Basha paraqitej stoik si atëherë kur ishte ministër i Transporteve dhe i doli nami si ministri më i korruptuar me Rrugën e Kombit. Basha në mesazhin e tij të djeshëm ishte i pavetëdijshëm, si atëherë kur ishte ministër i Jashtëm dhe firmosi shitjen e detit. Por, dje ai u shfaq edhe hipokrit i skajshëm, pasi ashtu si ustai që e kurdis në prapaskenë, për të fshehur aferat e shumta korruptive dhe vrastare, ai u hodh në sulm duke folur për pazare dhe grabitje të pronave në bregdet nga qeveria e re që nuk ka nisur ende nga puna. Dhe kush flet kështu? Pikërisht ky njeri që është akuzuar si rrallëkush tjetër për korrupsion, për grabitje pronash, për ndërtime pa leje… Kur ai flet për grabitje të pronave në bregdet, të gjithëve u shfaqet pallati i tij gjigant që ka ndërtuar në Ujin e Ftohtë në Vlorë. Pra Bashën nuk e ha fort meraku për pronat e të tjerëve, po për pronat e tij. Nejse, me urdhër apo jo, dje Basha shpërfaqi portretin e tij të vërtetë pa retush, një portret prej manekini të  drunjtë. Një manekini lodër në duart e të tjerëve, që e kurdisin, e vënë dhe e heqin nga vitrina sa herë të dua dhe kur të duan. Sepse ai nuk është vetvetja. Dihet se manekinët nuk kanë as tru, as shpirt, pa le vizion jo se jo. Dhe ky pretendohet të udhëheqë opozitën e nesërme! Çfarë fatkeqësie që e ka zënë Partinë Demokratike me këtë manekin!