Meshkujt shqiptarë vazhdojnë të mos e pranojnë dot ndarjen, kur atë e kërkon bashkëshortja. Një tjetër vrasje që ka në origjinë ndarjen e çiftit është shënuar sot në Kuçovë. Fatkeqësisht, tragjedia e sotme ka qenë e dyfishtë, pasi autori i krimit, Riza Latifi, ka vrarë dy prindërit e bashkëshortes dhe ka plagosur rëndë këtë të fundit.
Ngjarja ndodhi mëngjesin e sotme në banesën e Rexhep Muços, në lagjen “1 Maji” të Kuçovës. Dhëndri ka vrarë me armë zjarri vjehrrin, Rexhep Muço, dhe ka plagosur vjehrrën dhe bashkëshorten e tij. Pak kohë pas ngjarjes, ka ndërruar jetë në spital edhe Vasilika Muço, bashkëshortja e viktimës.
Autori i krimit është larguar nga vendi i ngjarjes. Burimet bëjnë të ditur se edhe gruaja e autorit të krimit, Engjëllushe Latifi, ka marrë plagë të rënda dhe ndodhet në gjendje kritike për jetën. Ndërkohë, policia është vënë në ndjekje të autorit të krimit, ndërsa paralelisht po punohet edhe për zbardhjen e plotë të rrethanave të ngjarjes tragjike. Mësohet se Engjëllushe Latifi kishte kërkuar divorcin nga i shoqi dhe ishte kthyer në shtëpinë e prindërve.
Një ditë më parë, në Dibër u zbulua një tjetër krim brenda familjes. Xhemile Suka, 30 vjeçe, kishte vrarë katër ditë më parë vjehrrën e saj, të cilën e kishte varrosur në kasollen e lopës, në bashkëpunim me kunatën.