Çmenduri në Kuçovë, vritet brenda në shtëpi 22-vjeçarja, plagoset vëllai për një telefonatë të ndërprerë

Një grindje për shkak të xhelozisë mes një çifti ka shkaktuar një të vdekur dhe një të plagosur në qytetin e Kuçovës, ndërkohë që autori i dyshuar është arrestuar më pas nga policia.

Ngjarja ndodhi mesnatën e mbrëmshme, në banesën e Kujtim Demajt.

Vajza e tij, Denisa, 22 vjeç, gjeti vdekjen, ndërsa vëllai i saj mbeti i plagosur rëndë dhe rrezikon jetën. Vëlla e motër u qëlluan me armë zjarri nga Klaus Sakolli, 29 vjeç, nga qyteti i Kuçovës.

Ky i fundit mësohet se kishte një lidhje me vajzën e cila punonte në një nga firmat e konfeksioneve në Berat.

Një grindje për motive xhelozie ka bërë që autori i dyshuar të shkojë në banesën e vajzës dhe në grindje e sipër të qëllojë me armë automatike ndaj saj, ndërkohë që në mbrojtje të vajzës ka ngelur i plagosur vëllai i saj, i cili u transportua drejt Spitalit Ushtarak në Tiranë me helikopter.

Ngjarja ka ndodhur për shkak të një telefonate të mbyllur. Kështu ka deklaruar në polici, autori i krimit, Klaus Sakolli.

Ai ka thënë se Denisa i kishte mbyllur telefonin dhe kjo gjë e ka acaruar.

“Unë e doja vajzën. Mirëpo ajo më mbylli telefonin dhe unë u acarova jashtë mase.

Mora të atin dhe ai me tha hajde sqarohemi nesër, por unë doja të sqarohesha sot. Pastaj shkova me armë, u hodha nga muri dhe ndodhi ajo që ndodhi”, ka thënë ai në polici.

“Djali ka hyrë nga nga muri i banesës një katëshe dhe ka shqyer derën. Direkt ka qëlluar vajzën në kokë. I vëllai ka ndërhyrë për ti marrë armën dhe e ka zënë plumbi në bark. Më pas ka dalë nga muri dhe u largua”- ka dëshmuar Mynur Demaj, djali i xhaxhait të viktimës.