Kukësi u nis drejt Ulqinit pasi zyrtarizoi dy goditje të rëndësishme në merkato. Klubi verilindor ka arritur akordin përfundimtar me sulmuesin nga Tetova, Izair Emini, i cili firmosi me Kukësin para se të bashkohej me skuadrën në stërvitjen e fundit në Shqipëri para nisjes së mini fazës përgatitore në Mal të Zi.
Izair Emini, 30-vjeçar, është një qendërsulmues me eksperiencë që vjen nga radhët e Renovës, skuadër me të cilën sezonin e kaluar u shpall dhe kryegolashënues i kampionatit maqedonas me 20 finalizime.
Në këtë sezon Emini ka shënuar 6 gola në 14 takime në të cilat është aktivizuar me Renovën. Në këtë mënyrë presidenti Gjici i ka vënë në dispozicion dyshes drejtuese Lika-Duro një qendërsulmues me përvojë, duke shpresuar që skuadra të zgjidhë problemin e konkretizimit para porte, çka e ka penalizuar në shumë ndeshje në fazën e parë të sezonit.
Pothuajse në të njëjtën kohë me Eminin u zyrtarizua edhe blerja e brazilianit Williams Gomez Vital Da Silva, ndërkohë që klubi ka përgënjeshtruar zërat për një largim të Matheus Lima-s . Sipas Kukësit sulmuesi ka kërkuar leje për tu larguar për disa arsye familjare dhe klubi e pret të kthehet sipas këtij akordi për ta patur në dispozicion për gjysmën e dytë të sezoni, pasi në të kundërt Lima do të vuajë të gjitha penalitetet që rrjedhin nga lidhja e tij kontraktuale me klubin.
Skuadra e Kukësit zhvilloi edhe stërvitjen e fundit në Tiranë para se të nisej drejt Ulqinit ku do të zhvillojë një minifazë përgatitore prej 12 ditësh, ku skuadra do të zhvillojë edhe disa takime miqësore.