Kur do të hapen kutitë e elektrikut?

Letër e nënshkruar

Teki Koka, Tiranë

I nderuar Kryeredaktor, z.Thano. Problemi që kërkoj të sensibilizoj përmes kësaj letre, unë jam i sigurt se nuk është vetëm personal, por është dhe shqetësim i të gjitha familjeve shqiptare. Shqipëria dhe në demokraci përsëri është vendi i çudirave të mëdha, ku shteti i vjedh hapur qytetarët dhe qytetari jo vetëm nuk e gjen kurrë të drejtën, por ai duhet dhe të heshti dhe kur shteti me forcë i rrëmben dhe pronën e tij, sahatin e energjisë elektrike duke e kyçur e “burgosur” në kuti metalike të cilën e administron vetë CEZ-i dhe qytetari nuk e kontrollon (lexon) kurrë konsumin e energjisë në matësin e tij për çdo muaj dhe faturën e plotëson vetë sa të dojë lexuesi i CEZ-it.

Shqiptarët e kuptojnë mos hapjen e kutive të votimit për transparencën e zgjedhjeve elektorale, sepse e ndalon politika për të mbajtur pushtetin, pasi ajo ka manipuluar procesin zgjedhor dhe votën e qytetarit. Por shqiptarët e ndershëm, nuk e kanë kuptuar asnjëherë mbylljen dhe burgosjen e sahateve të elektrikut në çdo pallat, pavarësisht ankesave permanente të qytetarëve për faturat e kripura të dritave prej CEZ-it për 24 vite rresht. Patjetër, nuk ka asnjë arsye, nuk jepet asnjë shpjegim dhe nuk gjendet asnjë argument tjetër justifikimi, përse të kyçen matësit (sahatet) e energjisë elektrike, përveç vjedhjes të qytetarit.

Padyshim vjedhja permanente e shqiptarëve në vite ka ndodhur, sepse morali i shtetit nuk shihet, sepse zëri i qytetarit nuk dëgjohet dhe se drejtësia shqiptare nuk vepron. Përballë kësaj situate absurde e arrogancës ekstreme të kompanisë (CEZ-it) dhe korrupsionit të pandalshëm, shqiptarët pas pritjes së gjatë, jo vetëm nuk duhet të heshtin, por aktualisht duhet të protestojnë ndryshe e vazhdimisht kundër vjedhjes e korrupsionit, duke mos paguar konsumin e energjisë deri kur operatori të realizojë detyrimin ligjor për t’i dorëzuar përsëri matësin (sahatin) qytetarit në banesën e tij në mënyrë që ai të lexoj vetë në çdo kohë energjinë e konsumuar gjatë muajit në sahatin e tij.

Padyshim shteti (operatori) përsëri do të vazhdojë vjedhjen e qytetarit deri kur shqiptarët të mos heshtin por të reagojnë me protesta të vazhdueshme kundër vjedhjes dhe n.q.s do të vazhdohet me arrogancë e nuk do reflektohet, atëherë dhe qytetari të kalojë deri me veprime ekstreme duke mos paguar për vjedhjen e hapur, por dhe qeveria të zgjohet nga gjumi dhe të mos qëndrojë indiferente duke mos reaguar dhe vetëm po justifikohet.