Kur të përgëzon Saliu

Andrea Stefani

Një pyetje për ca përfaqësues të shoqërisë civile: Kush është më i rrezikshëm për ardhmërinë e Shqipërisë, riciklimi i mbetjeve apo riciklimi i plehrave të politikës, si Sali Berisha e kompani, që e kanë rrënuar shtetin dhe mjedisin për mbi dy dekada tranzicion?

Sali Berisha u shfaq shumë i entuziazmuar nga protesta që disa OJF organizuan përpara kryeministrisë, mu aty ku në 21 janar 2011 ai vrau 4 protestues. Dhe si përherë kur i leverdis (ai nuk mund të mos gënjejë), tha se qe protesta më e madhe e shoqërisë civile edhe pse u pa qartë nga xhirimet ajrore se, me gjithë infiltrimet e SHQUP-asve, ishin vetëm disa qindra vetë.

Në këtë skenar, të parë edhe në vitin 2005, shqetësues është qëndrimi kinse i verbër i organizuesve të protestës. Shkurt, sikur nuk duan t’ia dinë për pasojat politike të aksioneve të tyre ekologjike. Por Shqipëria është një shtet që nuk e ka stabilizuar formën demokratiko-liberale të qeverisjes. Në gjithë këto vite tranzicion ajo mbetet e kërcënuar nga gjakime autokratike. Pionieri dhe kampioni i këtyre gjakimeve është Sali Berisha. Prandaj, një shoqëri civile e përgjegjshme për fatet e vendit, duhet të jetë e ndjeshme kur shikon se veprimet e saj përgëzohen nga një autokrat qe e ka provuar me dekada se nuk ja ndjen fare për mjedisin por vetëm për pushtetin. Ndryshe është papërgjegjshmëri për fatet e vendit. Por edhe për objektivin e saj të ruajtjes së mjedisit. Sepse një autokrat jo vetëm s’të pyet, por edhe të vret po protestove. “21 janari” është provë e përgjakshme për këtë. Kush e harron, e pëson.

Nuk ka asnjë dyshim se në protestën e 1 tetorit kishte mjaft ambientalistë të devotshëm. Por kishte edhe mjaft berishistë të interesuar jo për mjedisin por për rrjedhojat politike të protestës. Si dhe vetë Berisha apo Lul Basha. Drejtuesit e protestave nuk duhet të bëjnë të verbrin përballë kësaj lakmie të zgjuar të Saliut për të keqpërdorur në funksion të ambicies së tij për rikthim në pushtet kauzat e shoqërisë civile. Aq më tepër ato të mjedisorëve. Sepse ai është një ndër fajtorët kryesorë të degradimit të mjedisit në këto 26 vjet. Dhe duhet të jesh naiv të besosh se e ka me të vërtetë atë gjysmë “më fal” që tha lidhur me ligjin për importin e plehrave që miratoi në vitin 2011. Them “plehrave” dhe jo mbetjeve, sepse ligji lejonte edhe importimin e ca mbetjeve të pariciklueshme. Duhet të jesh naiv ta besosh këtë kameleon kur thotë “më falni” sapo mësojmë se vetëm vitin e fundit në pushtet qeveria e tij ka importuar 640 mijë ton mbetje dhe plehra.

Gjërat janë të qarta. Nën lidershipin e Saliut të maskuar me “lule” PD ka mbetur pa kauzë të besueshme. Prandaj përpiqet të shfrytëzojë kauzat e shoqërisë civile për t’u ricikluar. Si në vitin 2005. Prandaj për drejtuesit e shoqërisë civile, në rastin konkret, shtrohet çështja, kush është më i rrezikshëm për fatet e vendit, importi i mbetjeve të riciklueshme apo riciklimi i plehrave të politikës 26 vjeçare që janë fajtorët kryesore edhe për degradimin e mjedisit, të plazheve, pyjeve, lumenjve deri edhe ajrit? Të mos e bësh këtë bilanc, do të thotë të mendosh ngushtë dhe afër për përfitime momentale dhe jo gjerë dhe larg për fatet e vendit apo edhe atë të mjedisit. Se një autokrat të vret dhe s’të pyet. Si në 21 janar.

Dhe mund a të besohet një autokrat, që as ja ka ndjerë për mjedisin për 26 vjet, vetëm pse thotë “më falni” për bëmat e tij kundër mjedisit jo pse i dhimbset ky i fundit, por pse i duhet “shoqëria civile” si gjethe fiku për t’u rehabilituar dhe maskuar me të hallatet e një epshi të pangishëm për pushtet? A mund të bëjnë kauzë të përbashkët ambientalistët me një ish-kryeministër që mësohet se ka importuar në vend rreth 640 mijë ton mbetje ndër të cilat një pjesë jo të riciklueshme pra, plehra? A mund të bëjë kauzë të përbashkët shoqëria civile në protestë me autokratin që, kur qe në pushtet, vrau protestën?!

Sado të drejtë të ketë shoqëria civile lidhur me ligjin e importit të mbetjeve të riciklueshme të qeverisë Rama (personalisht mendoj se në këtë rast ajo gabon) nuk mund të pranohet që shqetësimi i saj të keqpërdoret, si në 2005 me KOP-in, nga një autokrat me damkë për rikthim në pushtet. Edhe pse mendoj që janë në gabim, mendoj gjithashtu se shoqatat ambientaliste janë të lira të vazhdojnë aksionin dhe protestat e tyre. Tashmë, askush nuk i kërcënon me plumb. Por duhet të kenë përgjegjshmërinë për fatet e vendit duke u distancuar nga SHQUP-i dhe duke mos toleruar manipulimin prej tij.

E në rast se dikush më thotë se edhe Rama është një autokrat, do i përgjigjesha me të qeshur se nuk bëhesh dot autokrat pa kapur pushtetin e drejtësisë, një pushtet që, më së shumti e ka akoma nën kontroll Saliu. Prandaj them, se ai është një autokrat edhe në opozitë. E në rast se më thonë që reforma në drejtësi, e dizenjuar nga SHBA dhe BE, synon t’ia marrë drejtësinë Saliut dhe t’ia japë Ramës, do i përgjigjesha vetëm me një të qeshur…