Kurbanët e Ulajt. Po ai vetë ç’fsheh?

Nga Erion Habilaj

Të pathënat e largimit të dy drejtorëve që firmosën skandalit e Unazës së Re dhe OST-së, pas të cilit fshihet biznesmeni Ulaj. Po ai vetë çfarë fsheh?  Gjiknuri, Qëndro dhe Gradeci janë tashmë “më të disponueshëm” se më parë për hetuesit. Por ndërsa ish-ministri dhe dy drejtorët e tij po komentohen gjerësisht  si “kurbanë të Ulajt”, ky i fundit shihet si dëshmitar i urave të panjohura Berisha-Rama. Ura, ende të pandriçuara plotësisht, mbi lumin e aferave të errëta financiare me paratë e shtetit. Lumë që me sa duket, rrjedh përherë në drejtim të kundërt me retorikën e ashpër politike që i serviret publikut nga salla e Parlamentit dhe selitë e partive

Ministrja e re Belinda Balluku e ka filluar punën duke prerë një nga një kokat e tre drejtorëve më të rëndësishëm të “erës së Damian Gjiknurit”, dy prej të cilëve janë përfshirë drejtpërdrejtë në tenderat me letra fallco të kompanisë DH Albania, pas së cilës, sipas një hetimi të Zërit të Amerikës, fshihet biznesmeni Bashkim Ulaj.

Fillimisht “dha dorëheqjen për arsye personale” drejtori i Operatorit të Sistemit të Transmetimit, Klodian Gradeci.  Gradeci, që më sa duket ka pranuar të largohet me mirëkuptim, u shoqërua pak orë më vonë nga shkarkimi i drejtorit të Rrugëve, Afrim Qëndro.

A janë këto lëvizje dorëheqje “për arsye familjare”?  Apo “kokëkrisje” të ministres që sapo ka filluar detyrën dhe ende nuk është njohur me dosjet e punës së gjithsecilit për mirë apo për keq?

As njëra, as tjetra. Largimet e dy drejtorëve janë urdhëruar dhe vendosur nga kryeministri Rama.

Gjiknuri-dy drejtorët apo Ulaj-Rama?

Biznesmeni kontrovers Bashkim Ulaj, i cili në Malin e Zi është akuzuar për trafik droge dhe pastrim parash, prej disa kohësh, herë drejtpërdrejt e herë nën emra të rremë po fitonte njëri pas tjetrit tendera me vlerë qindra milionë euro.

Sikur mos zbulohej skandali i Unazës dhe OST-së, kjo rrjedhje e habitshme miliarda lekësh në një kohë të shkurtër, me miratimin e Ramës drejt atij që njihet botërisht si biznesmeni i familjes Berisha, do vijonte e qetë dhe e pandërprerë.

Ministri Gjiknuri dhe dy drejtorët e përfshirë, tashmë të tre janë larguar.

Shuma e madhe e këtyre dy tenderave me vlerë 30 milionë euro, por dhe falsifikimi i firmës së sekretarit të Shtetit dhe të vulës apostile të SHBA, është ndërkohë nën hetim.

Hetim që veç të tjerave, pritet ti japë përgjigje pyetjes: Ministri dhe dy drejtorët që kanë firmat mbi ato letra, kanë vepruar me kokën e vet? Apo përfshirja e tre zyrtarëve të lartë është vetëm një rrjedhojë administrative e lidhjeve të drejtpërdrejta Ulaj-Rama?

Biznesmeni dhe Kryeministri janë parë bashkë në publik pak përpara shpalljes së fituesve të tenderave, madje mes të dyve kishte një atmosferë shumë miqësore, ndërsa kryeministri mbajti fjalimin përshëndetës në hapjen e A2 një kanal televiziv i investuar nga z.Ulaj.

Sa i përfshirë është vetë kryeministri në këtë aferë? Duke gjykuar nga reagimet e tij të para dhe ato që ndodhën më pas, rezulton se është e vështirë të besohet se ato që kanë ndodhur me tenderat e Unazës dhe OST, të kenë ndodhur pa dijeninë dhe urdhërat e tij.

A fillimisht tentoi të relativizonte skandalin duke deklaruar se “tendera të falsifikuar ka në gjithë botën”.

Në fund të dhjetorit, duke folur për rastin e kompanisë DH Albania, kryeministri Edi Rama deklaroi se “kompani që hyjnë me letra të falsifikuara nëpër tendera ka në të gjithë botën. Një qeveri, një ministri, një ministër nuk gjykohen nga fakti nëse hyn apo nuk hyn një kompani me letra të falsifikuara. Gjykohen nga mënyra sesi reagojnë në momentin kur fakti konstatohet… Përsa i përket rastit në fjalë, ku është korrupsioni që ka ndodhur, që të jem unë i qartë? Si?” u shpreh ai.

Ai madje spekuloi duke nënkuptuar një hetim “të përbashkët” me amerikanët për të nxjerrë fajtorët.

Ishte një gënjeshtër dhe burimet amerikane të informacionit reaguan me mënyrën e tyre.

Zëri i Amerikës publikoi informacione që dëshmonin se administrata shqiptare jo vetëm nuk ishte kaq e pafaj dhe e pafat në këtë punë, por ajo e ka ndihmuar kompaninë DH Albania për marrjen e licencës së ndërtimit në zbatim, duke nisur procedurat, përpara se vetë kompania të regjistrohej zyrtarisht në Qendrën Kombëtare të Biznesit (!).

Informacionet e siguruara nga Zëri i Amerikës, në fakt dëshmuan qartë se institucionet shqiptare ishin vënë në shërbim të plotë të kompanisë, madje edhe në shkelje të rregullave dhe kërkesave ligjore.

Të shkarkuarit, “kurbanë të Ulajt”. Po më pas?

Raporte konfidenciale diplomatike në Tiranë përmbajnë dëshmi sipas të cilave jo vetëm drejtorët por edhe ministrat e kabinetit qeveritar “janë kukulla” dhe asnjë firmë nuk hidhet pa dijeninë dhe urdhërin e Edi Ramës.

Në çdo rast, pikëpyetja deri ku arrin përfshirja e kryeministrit Rama në këtë aferë, do marrë përgjigje nga hetime serioze dhe të pavarura.

Prokuroria ka deklaruar ndërkohë se po heton si për veprat penale të falsifikimit ashtu dhe për atë të shpërdorimit të detyrës, nga ana e institucioneve të përfshira.

Megjithatë, ajo nuk ka mundur ende të thërrasë Avdjol Dobin një ish-recepsionist spitali, me lidhje me biznesmenin Ulaj, i cili formalisht ka emrin në krye të kompanisë që ka kryer falsifikimet. Dobi, të paktën zyrtarisht, nuk rezulton të ketë dalë nga Shqipëria, ose ka dalë me identitet të rremë, duke përfituar nga lidhjet e hershme dhe që vijojnë edhe sot (madje së fundmi janë përforcuar) të njerëzve të Berishës në polici.

Ndërsa Gjiknuri, Qëndro dhe Gradeci janë tashmë “më të disponueshëm” se më parë për hetuesit, madje ka zëra se kjo aferë do jetë e para në listën e hetimeve të SPAK, struktura antikorrupsion e niveleve të lartë që pritet të finalizohet së shpejti në kuadrin e ngritjes së institucioneve të reja të sistemit të drejtësisë.

Por ata shihen gjerësisht vetëm si  “kurbanë të Ulajt” dhe ky i fundit, një dëshmitar i urave të panjohura Berisha-Rama në lumin e aferave të errëta financiare me paratë e shtetit.

Lumë, i cili, me sa duket rrjedh përherë në drejtim të kundërt me retorikën e ashpër politike që i serviret publikut nga salla e Parlamentit dhe selitë e partive.