Kush janë të marrët?!

Nga Jorgo Mandili

“Shqiptarë po dolët në votime jeni të marrë dhe ju vraftë Zoti dhe ju qorrofshin sytë  nëse votoni. Ju zëntë bukën e kalamajve”-tha Ceka ndër të tjera në një studio televizive, teksa shtoi se “të drejtën e votës e ka sjellë ai me disa shokë”.

Po e drejtë është. Ti me disa shokë që veshët “Pardesy të bardha” dhe që nga ajo kohë u bëtë të paemër e vazhdoni ta përsërisni e ta festoni, si heronj e martirë është e drejta juaj, është historia juaj që ta interpretoni si fitimtarë.

Po çfarë keni me historinë e  Partisë komuniste, si u krijua, nga kush u krijua, si veproi, si u soll etj? Të paktën për atë parti ekzistonin grupet komuniste? Po ju nga u krijuat, a kishte disidencë në Shqipëri që të përpiqej të na sillte votën siç pretendoni ju zoti Ceka? Si dolët papritur nga “Hiri i zhuritur i diktaturës së “ndritur”, që ju kish krijuar juve edhe shokëve tuaj “pardesybardhë” privilegje, që nuk i kishte asnjë komunist i thjeshtë? Dhe na u shfaqet si “Feniksi” i demokracisë, pa shfaqur asnjë kritikë pa le disidencë ndaj atij sistemi.

Do të ishte në nderin tuaj dhe të shokëve të tu, që të jeni më të sinqertë me popullin, duke i shprehur ndryshe, ashtu siç është e vërteta. .. mund të thoshit p.sh. pas “mallkimeve shtrigane”:  “ne na kishin caktuar t’u jepnim të drejtën e votës ” për kontributet ” që kishin dhënë të parët tanë dhe për garancinë që iu dhamë atyre që na përzgjodhën ne” .

Kjo është më e ndershme dhe koha e vërtetoi se kjo ishte e vërteta. Se nëse do ishte e vërtetë se ju na i sollët të drejtën e votës së lirë, atëherë mund të na thoni se ku ishit ju në 60, 70, 75, 80, 81, 82, 83, 84, 85, 86, 87, 88, 89,… Pse nuk bëtë të paktën një përpjekje për ta sjellë këtë votë?

Zotërinj! Kemi kaq vite që dëgjojmë për “kontributin”, “heroizmat” dhe “heronjtë” e Partisë Demokratike të cilët “u përleshën” me një “sistem diktatorial e gjakatar” dhe ja dolën më së fundi të “fitonin në Dhjetor të ’90”. Le t’i lëmë këto përralla të “pardesyve të bardha”, të mbrojtur nga Sigurimi i Shtetit e të urdhëruar nga R. Alia  e që tani në çdo dhjetor na tregojnë “heroizmat e përmbysjes” të një sistemi të përmbysur!

Ka fakte dhe dokumente që KGB-ja e kishte parashikuar qysh në vitin 1974 dhe ja kishte paraqitur gjendjen Byrosë Politike të BS. Gorbaçovi u përpoq ta  shpëtonte sistemin komunist duke kryer  reforma “kozmetike” si “gllasnosti” dhe  “perestrojka” . Por nuk mundi. Sistemi komunist ishte i destinuar të binte se po hante vetveten.

Gorbaçovi si i preferuari i “perëndimit të afërt dhe të largët” me “dëshirë të detyruar” deklaroi rënien e “Murit të Berlinit” dhe pastaj o burra kush të merrte një gur, një tullë, një copë betoni të atij muri për të treguar “heroizmin” e kontributin e vet në rrëzimin e një muri të rrëzuar .

Kjo është edhe fillesa e luftës kundër komunizmit e “pardesyve të bardha”. Dhe kur “ra ariu rus”, atëherë dolën lepujt e minjtë nga strofkat dhe skutat e KQPPSH, të Sigurimit të shtetit dhe të dikastereve të ndryshme të atij shteti të rrënuar. Rreth “pardesyve të bardha” u mblodhën gjithë të pakënaqurit: komunistë e të paaftë, “lumpeni” i punëtorëve, fshatarëve, nëpunësve të partisë dhe pushtetit  dhe gjithë revanshistet ballisto – zogistë, diversantë e ish kolaboracionistë, dhe nën udhëheqjen e “komunistëve pardesy bardhë” zbatuan Katovicën “, duke vjedhur, djegur, vrarë, shitur, prerë e shkatërruar çdo vlerë materiale dhe morale dhe duke vendosur atë regjim “demokratik” që jetojmë sot, që i drejtpërdrejti, pa ekuivoke në përcaktime, Rexhep Qosja e quan “demokracia totalitare e zbatuar në mënyrë skllavopronare “.

Këtë demokraci instaluan këta falsifikatorë të historisë më të re të Shqipërisë. Që  festojnë me tam-tame  si “martirë” të demokracisë. Që ka ende dëshmitarë e dëshmi të gjalla për “kontributin e secilit”, intrigat, shantazhet e vrasjet për ata që u  pengonin rrugën. Përfytyroni se çfarë mashtrimesh, falsifikimesh e gënjeshtrash mund të thuren për ngjarje të 75 vjetëve më parë ?

Që kërkojnë të rehabilitojnë ballistoidën kolaboracioniste. Hajde pastaj t’u besosh këtyre të paskrupujve. Mos u habisni .. historia njeh edhe karagjozllëqe e komedira të tilla.”Epopeja e “pardesyve të bardha” , popullit shqiptar iu servir si “liri e demokraci” por në fakt ka qenë dhe mbetet sundimi e skllavërimi i  realizuar me “terror”.

Dhe kjo për hir të një njeriu, misioni i vetëm i të cilit ka qenë shkatërrimi, në emër të “anti-komunizmit” të çdo vlere materiale dhe shpirtërore të atij sistemi. Koha shumë shpejt e vërtetoi  synimin e tij. Psikologjia e terrorit që aplikoi Saliu nuk ishte spontane por e mirorganizuar. Dhe  Partinë Demokratike e kthehu në një parti destruktive dhe terroriste e cila, përgjatë këtij tranzicioni, si në pushtet ashtu edhe në opozitë u ka ngrirë buzëqeshjen shqiptarëve dhe tani me të njëjtën psikologji terrori dhe veprime guerrilase si hedhja e shtyllave të tensionit të lartë në erë, djegia e pyjeve, bombave molotov e mjete të tjera kërkon t’u thajë edhe shpirtin shqiptarëve.

Tani që është kthyer në një bandë rrugësh po e tregon fytyrën e vërtetë. Një parti që pretendonte se solli demokracinë por pa asnjë aspiratë demokratike. Një parti që pretendonte se ishte e djathtë, por shumica e anëtarëve të saj  “pronarë të toka e të xanuna”, ish-komunistë servilë e karrieriste, ish të dënuar për vjedhje, gjakmarrje, vrasje, arratisje e të konvertuar në të persekutuar politikë “lumpeni i shtresave shoqërore”, u bë forca kryesore e kësaj së “djathtës” të çuditshme që u quajt PD.

Këta ishin ata që do të sillnin demokracinë funksionale, shtetin e së drejtës dhe institucionet e qëndrueshme. E përfytyroni tani “shpërfytyrimin” që pësoi Shqipëria nga njerëz të tillë të inspiruar  nga “monstra” destruktive dhe nekrofilike -Sali Berisha. Liria pa fre dhe politikat pa tru që ndoqi kjo parti e çuan vendin në këtë marrëzi që përjetojmë sot. Epopeja e “pardesyve të bardha” po bëhet më e trishtueshme, komike dhe tragjike se “Epopeja e Ballit Kombëtar” dhe ikja rrugaçërore dhe e papërgjegjshme e “idiotëve të dobishëm” (ish deputetët e mjerë) të Sali Berishës, nga parlamenti do të jetë fundi i tyre.

Këtë term “idiot i dobishëm” e përdorte Lenini për të ironizuar akademikët, gazetarët dhe politikanët të cilët besonin mitet sovjetike dhe i përsërisnin ato pa fund siç po na i përsërisin ende disa akademikë, profesorë, gazetarë e moderatorë sot. Mirë këta se janë nën diktatin e Saliut se i ka pasur këshilltarë, ministra, deputetë dhe janë të detyruar të besojnë mitet e tij dhe detyrimisht të  përdoren si “idiotë të dobishëm”.

Madje Fatmir Gërdecin, se e ka mbërthyer nga t……., Ndoka nuk ka nevojë të përdoret se vetëpërdoret … e ka në gen…. Pëto si Pëto Idrizi gjithmonë është përdorur që nga Nano … epo .. Dashi si “dashamir”, që është nuk ja prish qejfin  njeriu, por… kurrë nuk më shkonte mendje të përdorej Vangjel Dulja (të paktën jo nga “fqinjët” shqiptarë), që “shquhet” për një koeficient inteligjence më të lartë se të gjithë së bashku, duke përjashtuar Agron Dukën. “Duka” i madh si lab nuk para përdoret, por meqë i ka premtuar Xhuvelit (që i dhuroi partinë) për ta mbajtur lart flamurin e  “Xhuvelizmit”, nuk mund ta presë në besë.

Nejse, është histori më vete Epopeja e “idiotëve të dobishëm”. Nuk janë vetëm këta që janë përdorur, por ka edhe shumë të tjerë “idiotë të dobishëm”… politikanë, deputetë, akademikë, profesorë, filozofë, shkencëtarë, gazetarë, moderatorë, shkrimtarë etj., që janë përdorur dhe përdoren nga Saliu që besojnë “mitet” e  “qytetarit dixhital” dhe i promovojnë si të vërteta duke shkrirë të gjitha aftësitë potenciale që disponojnë. Kemi që nga 16 shkurti që po i dëgjojmë, që po bëjnë të pamundurën që revoltën e tyre personale ta kthejnë në revoltë popullore.

Po shumica e popullit u ka varur pafidhen. Dhe në vend që numri në protestën e tetë të rritej, përkundrazi sa vete e izolohet tek militantët. Kjo i tërbon dhe i detyron ata “demokratë” që na kanë sjellë “lirinë dhe demokracinë” ta mallkojnë këtë popull si Ner(it)oni.

*****

Botuar në Dita. Ndalohet ribotimi i plotë ose i pjesshëm pa lejen me shkrim të redaksisë