Kush kërkon të ndajë Ramën me Metën?

Një grup biznesmenësh apo superparellinjsh po i bëjnë presion kryeministrit Rama që të prishet me Ilir Metën.

Kështu shkruante dje Artur Zheji në një editorial te Mapo. Sipas Zhejit, ky grup biznesmenësh kërkon ta shndërrojë kryeministrin në një kukull apo instrument të interesave të tyre.

Pra, që kryeministri të mbështetet tek ata dhe tek asetet e tyre dhe jo te një koalicion politik, si edhe është realisht koalicioni i sotshëm Rama-Meta.

Më tej në shkrim ai ngre pyetjen nëse për Ramën do të ishte më e favorshme të kishte partner këta biznesmenë apo Ilir Metën:

“Më konkretisht, çështja shtrohet: Është më mirë që Kryeministri Rama të kushtëzohet nga aleati politik Ilir Meta (me gjithë sikletin që të kesh aleat Ilir Metën, dikur ish-shef, ish-mik, ish-armik dhe me rekordet e veta ambicioze), apo të kesh aleat një grupim biznesesh, të cilët me kalimin e kohës e klasifikojnë dhe do e kushtëzojnë kryeministrin, që të shndërrohet, herët a vonë, në një kryemenaxher të sipërmarrjeve të tyre?”– pyet Zheji.