Kush u dha shtetësinë shqiptare indianëve të akuzuar për pastrim parash?

Ende nuk ka informacion të plotë mbi tre shtetasit indianë që kanë marrë shtetësinë shqiptare, por që në vendin e tyre ishin akuzuar për pastrim të parave.

Institucionet e sigurisë kombëtare nuk kanë dhënë një shpjegim mbi këtë ngjarje. Dhënia e nënshtetësisë shqiptare për dy shtetasit indianë ka vënë në dyshim funksionimin e institucioneve të sigurisë shqiptare.

Në reagimin e tij presidenti, Ilir Meta, ka deklaruar se për shtetasit e huaj, Nitin dhe Chetankumar Sandesara janë zbatuar procedurat ligjore bazuar në pikën 7, të nenit  9  të ligjit “Për shtetësinë shqiptare”.

Propozimi ka ardhur nga Ministria e Turizmit dhe Mjedisit, për shkak të eksperiencës në investime dhe historikut të sipërmarrjeve të suksesshme jashtë Shqipërisë dhe për shkak të angazhimit të tyre për realizimin e investimeve të rëndësishme elitare në vendin tonë.

Madje Presidenca sqaron se janë bërë të gjithë verifikimet nga agjencia ligj zbatuese nga e cila nuk kanë rezultuar të dhëna problematike për dhënien e shtetësisë shqiptare.

Por interesit të gazetarëve, Ministri i Mjedisit Blendi Klosi nuk ka dhënë asnjë përgjigje.

Edhe pse janë të akuzuar prej për pastrim të parave, një prej shtetasve indian është edhe Konsull Nderi i Republikës së Shqipërisë në Nigeri.

Por ish-ministri, Ditmir Bushati, shprehet në Facebook se “Procedurat për emërimin e Konsujve të Nderit janë të përcaktuara qartë në Konventën e Vjenës për Marrëdhëniet Diplomatike”

“Në çdo rast janë agjencitë e specializuara të vendit propozues dhe atij pritës që kryejnë verifikimin e pastërtisë së personit”, shprehet ai.

Vetëm një ditë më parë Interpol Tirana arrestoi shtetasin indian Hitesh Patel, 59 vjeç, lindur në Indi dhe banues në Nigeri.

Në Indi ata janë të akuzuar për vjedhjen dhe pastrimin e 725 milionë dollarëve.

Pasi kanë mbërritur në Shqipëri, ata kanë krijuar kompani investimesh.