Debati për furgonat, Rama sqaron: Ja mjetet që do bllokohen

Kryeministri Edi Rama ka akuzuar opozitën se gjatë 8 viteve që ka qënë në pushtet nuk ka bërë asgjë për transportin publik ndërsa tani I kërkon qeverisë llogari për rrugët që sipas tij I ka lënë rrugëve.

Duke folur në sallën e Kuvendit, Rama ka theksuar se opozita kërkon të nxjerrë përfitime politike duke akuzuar qeverinë për transportin publik. Ai shtoi se qeveria do të bëjë të mundur transformimin e transportit urban, ndërurban dhe ndërkombëtar.

“Kërkoni llogari për atë çfarë rëndom nuk dini se çfarë flisni por edhe kur jeni të vetëdijshëm për atë që kërkoni bëni sikur nuk e dini. Që si rregull keni pasur 8 vjet kohë për ta bërë dhe jo vetëm nuk e keni bërë por ose e keni lënë të degjenerojë në rënie të lirë ose e keni shkatërruar me dorën tuaj.  Dhe rasti i transportit publik është shumë domethënës sepse i tregon fare qartë të gjitha këto bashkë. Në 8 vjet as që e keni çarë kokën ndonjëherë ta ktheni ndonjëherë kokën nga qytetarët që udhëtojnë për ditë nëpër Shqipëri. Nga viti 2005-2013 janë vrarë nëpër rrugët e Shqipërisë vend I zhvilluar 2952 vetë dhe janë plagosur mijëra e mijëra të tjerë. Por ju çfarë keni bërë?  E di përgjigjen rrugë, rrrugë, rrugë. Keni bërë edhe disa shfaqje duke dalë në ato rrugë për të vendosur policët në çdo kilometër,” tha Rama

“Udhëtari sot kërkon siguri, ne duam siguri në këtë sektor. Udhëtari sot kërkon inovacion. Ajo që ndodhi në Tiranë që shërbimi i mjeteve 8 plus 1 nuk u konsiderua më një shërbim urban , por u kthye në një shërbim taksi krijoi hapësirën për të ndërtuar shërbimin urban me standarde evropiane.”- u shpreh kryeministri.

Më tej kryeministri theksoi se sistemi i transportit ndërurban duhet të riorganizohet, pasi furgonat kanë marrë jashtë ligjit rolin e shërbimit interurban duke falimentuar kompani të tëra autobusësh.

“Qeveria nuk do të lejojë më qarkullimin e mjeteve të palicencuara. Do tu japë kohë për tu riorganizuar të gjithë atyre që kanë një licencë të rregullt dhe që duhet të bëjnë një zgjedhje nëse do të kalojnë në shërbimin taksi normal, apo shërbimin urban brenda rrethit të përcaktuar nga autoriteti që jep licencën për ta. Qeveria do të ndërmarrë projektin për inovacionin dhe transformimin e gjithë sistemit të transportit tonë publik.”- deklaroi shefi i qeverisë.

***

Kuvend, pritet të diskutohet marrëveshja e interkonjeksionit Shqipëri-Kosovë

Kuvendi i Shqipërisë, në seancën e sotme plenare, shqyrton ratifikimin e tre marrëveshjeve me palën italiane në fushën e bujqësisë, si dhe ratifikimin e marrëveshjes ndryshuese mes qeverisë shqiptare dhe bankës gjermane KFW, për financimin e projektit “Linja e transmetimit 400 KV Shqipëri-Kosovë (Tiranë – Prishtinë).

Rendi i ditës i punimeve të Kuvendit parashikon dhe diskutimin e disa ndryshimeve në ligjin “Për sigurimet shoqërore”; miratimin e përbërjes së komisionit hetimor të Kuvendit “Për të kontrolluar zbatimin e legjislacionit në fuqi gjatë procesit të lëvizjeve të burimeve njerëzore të Policisë së Shtetit”.

Në fund të axhendës është parashikuar një interpelancë me ministren e Arsimit dhe Sportit, Lindita Nikolla, kërkuar nga deputeti i LSI-së, Vangjel Tavo, lidhur me masat e marra për çështjen e mungesës së teksteve shkollore në gjuhën amtare për shkollat e minoritetit.