Lajmi i “DITA”-s për kandidimin e Ramës në Vlorë, reagon Partia Demokratike

Pak orë pasi kryetari i Bashkisë së Tiranës, Lulzim Basha, tha se bashkia nuk merret me politikë, zëvendësja e tij, Jorida Tabaku, ka sulmuar kreun e opozitës, Edi Rama, nga selia e PD-së. Tabaku ka thënë se Rama ka frikë nga humbja spektakolare e pësuar në Tiranë gjatë zgjedhjeve vendore dhe për këtë arsye ka vendosur që mos të kandidojë në Tiranë. Sipas saj, qytetarët e Tiranës nuk mund të harrojnë gjithë premtimet e pambajtura nga Rama në 8 vjet dhe ai për këtë arsye ka vendosur që mos të kandidojë në kryeqytet.

“Rama kërkon të shmangë kandidimin në Tiranë, pasi nuk u kthen dot përgjigje kryeqytetasve pse e dogji Tiranën me 21 janar, lejet e ndërtimit që ka firmosur në kundërshtim me ligjin, pallatin e bashkëshortes së tij, zhdukja e terreneve të gjelbërta, parqeve të lojrave apo rrugëve të shtruara që u ka dalë asfalti elektoral. Qytetarët nuk e harrojnë ish- kryetarin e tyre që u deklaroi se nuk merret me punësimin, as bizneset nuk harrojnë dyfishimin e taksave” deklaroi Tabaku në një konferencë shtypi.

Tabaku ka thënë se asnjë qytet apo komunë në Shqipëri nuk do ta donte kandidimin e Ramës, duke qenë se sipas saj, ai ngado që shkon, ai ndjell vetëm humbje. Lajmi për kandidimin e Edi Ramës në Vlorë së pari është botuar në gazetën Dita dhe ndodhet mëposhtë…

***

Edi Rama do jetë deputet i Vlorës

Edi Rama deshiron të kandidojë për deputet në Vlorë. Burime nga selia rozë bëjnë me dije se lideri i opozitës me shume gjasa ka zgjedhur të kryesojë listën e kandidatëve për deputetë në qarkun e Vlorës. Kjo është hera e parë që kryesocialisti kandidon për deputet, pasi në zgjedhjet e vitit 2009, ai preferoi të mbante postin e kryebashkiakut të Tiranës dhe të mos ishte në listën e kandidatëve. Kandidimin e tij Rama e theksoi dhe gjatë ditës së djeshme, kur zhvilloi një bashkëbisedim me gazetarët. “Në sistemin e sotëm pjesa më e madhe e atyre që janë në parlament, janë deputetë automatikisht. Sepse gara zhvillohet mes palëve, dhe numri i deputetëve që janë mes hapësirës politike, është një numër i kufizuar. Unë patjetër do jem deputet si shumë të tjerë në skuadrën tonë kombëtare”, tha Rama. Po ashtu, Rama ka theksuar edhe faktin që ministrat e qeverisë socialiste nuk mund të mbajnë dy poste, duke u detyruar të japin dorëheqje nga mandati i deputetit. Pikëpyetjet lidhen me vetë zotin Rama, nëse do të lërë mandatin pasi të zgjidhet kryeministër, apo do t’i mbajë të dyja?! Po t’i referohesh historisë familjare të zotit Rama, ai rezulton se është gjysmë vlonjat, duke qenë se e ëma e tij, Aneta, është nga fshati Vuno. Në zgjedhjet e 23 qershorit, edhe kreu i mazhorancës nuk do të kandidojë në Tiranë. Në korridoret e selisë blu ka filluar të flitet se zoti Berisha do të jetë kandidat në qarkun e Durrësit, duke tentuar që të luftojë fort në atë qark, që në vitin 2009 ishte në favor të së djathtës. Në fakt, përveç kësaj, largimi i Berishës nga qarku i Tiranës lidhet dhe me humbjen spektakolare që bëri në zonën e tij në Kavajë, kur dy vjet më parë bashkia e këtij qyteti u fitua nga socialistët. Berisha është deputet i atij qyteti dhe humbja e ka detyruar të zhvendoset drejt Durrësit, për të mos përsëritur një humbje tjetër më 23 qershor.